ORANJESTAD (AAN): Aruba Hotel & Tourism Association (AHATA) ta reintroduciendo su campaña “Ami Ta Turismo”
cu e meta pa crea conscientisacion den nos comunidad di diferente oportunidad cu tin den nos sector turistico y pa demonstra e orguyo y pasion, di personanan dedica na e industria.
E campaña ta consisti di videonan di diferente personanan den hospitalidad, y cada un ta describi e importancia di su trabao. AHATA ta considera e persona nan aki como embahador di nos industria turistico; e pilar di nos economia. E videonan ta ilustra e diversidad di trabao y personanan den e sector, y con pasion y dedicacion di cada empleado ta representa Aruba su producto turistico cu ta reconoci mundialmente. E comunidad por ta orguyoso di e miles di persona cu ta brinda servicio na nos bishitantenan, y p’esey a scoge e nomber “Ami Ta Turismo”.
Tur siman lo introduci 3 “embahador” riba television y plataformanan social, cuminsando Dialuna 10 Juli, 2022. Cu e campaña aki AHATA ta spera di por crea mas conocemento di e industria y di inspira mas persona pa realisa un carera den nos industria turistico.
