Tisa LaSorte, CEO di AHATA:
ORANJESTAD (AAN) – Den entrevista cu DIARIO, Tisa LaSorte, CEO di Aruba Hotel & Tourism Association (AHATA), pa finaliza su entrevista cu DIARIO a comenta cu e reunion di AHATA cu Minister di Labor tabata un bon reunion.
Awo Ahata a crea un 'Task Force' cu ta bay traha un documento cu ta basa riba loke a papia den e reunion cu e mandatario, y e ora ey e minister por bay Ministerraad pa wak si e por haya e colaboracion di henter Conseho di Minister.
“Nos tin e speranza cu e reunionnan di e task force nobo lo tuma lugar pa nos no keda solamente na palabra, pero pa nos yega na accion. Pero nos ta sinti cu esaki ta un problema urgente”, refiriendo semper na e tema cu ta scarcedad de trahado pa e sector di horeca.
TisaLasorte no ta kere cu por soluciona e problema asina lihe cu ora e dos hotelnan cu ta bay habri prome cu fin di aña lo haya tur trahador cu nan mester.
“Esaki no ta un problema pa soluciona di un dia pa otro. Loke ta bay pasa ta cu mientras tanto hendenan lo aplica pa trabao y e lo ta un oportunidad sigur na caminda, pa cierto hendenan cu ta trahando pero cu lo prefera di bay traha na un hotel nobo, pero corda cu no ta solamente hotel. Tin otro companianan tambe den nos economia cu ta buscando trahado”, LaSorte a splica.
El a agrega cu e movecion ta bay keda y loke ta bay pasa e ora ey ta cu hopi compania no tin bastante trahado y e nivel di servicio ta baha pa tur. ‘Esey ta loke nos mester ta conciente di dje, y loke nos ta papia di dje ta cu hopi compania ta bay keda sin duna un servicio optimal, y esey ta loke ta un problema pa Aruba. E ta un problema pa nos reputacion, pa nos productividad, e ta bay tarda pa nos solucion’e, pero mas lihe nos cuminza cu un solucion tras di otro, mas lihe nos ta yega na algo”, Tisa LaSorte, CEO di AHATA a indica.
