Gobierno ta compronde y ta comparti e preocupacion di ‘overtourism’
ORANJESTAD (AAN): Na clausura di e Conferencia di Prensa di Gobierno di Aruba dia 2 di september, Prome Minister Evelyn Wever-Croes a gradici e miembronan di prensa y felicita nan un bes mas cu e Dia di Prensa cu ta wordo celebra dia 1 di september.
Prome Minister a clausura indicando riba palabranan di Minister di Turismo, Dangui Oduber. Aki el a referi riba e tempo duro cu Aruba a pasa aden durante e pandemia.
Aruba mester a cera frontera tempo di pandemia di Covid y no por a ricibi ningun turista. Tawata momentonan di hopi preocupacion pa henter e pueblo, pa Gobierno, pero sigur pa esnan cu ta biba di turismo. Un parti grandi di e poblacion ta biba di turismo y Aruba ta conoci pa su cordialidad. E ta hasta ancra den e himno y ta identifica e pueblo di Aruba.
Gobierno ta compronde y ta comparti e preocupacion di “overtourism”. Pa e motibo aki mes Gobierno a tuma e decision di no duna mas tereno ni permiso pa mas hotel. Manera ya ta conoci, Gabinete Wever-Croes I a hereda entre 7000 pa 8000 camber ora nan a sinta y a traha duro despues di esey pa logra baha e cantidad aki. E mandatario ta indica cu su persona como Prome Minister casi tur siman tin caso den corte unda empresanan ainda ta forsa Gobierno pa cumpli cu e promesanan duna door di e gobierno anterior.
Prome Minister:
“Nos ta sigui bringa cada caso den corte. Nos tampoco kier “overtourism” na Aruba. Tin proyectonan grandi cu ya lo wordo finalisa e aña aki. Ainda tin algun den ‘pipeline’ cu e permisonan duna door di e gobierno anterior y cu no por a wordo kita, pero despues di esey no tin mas. E preocupacion di e pueblo ta conoci cerca nos Gobierno y nos ta comparti esaki, pero agredi y insulta nos bishitantenan no ta e solucion, e ta contra nos DNA, contra nos principionan.
Nos ta un pueblo cordial, laga nos corda esey prome tur cos. Laga nos semper ta cordial cu nos mes localnan y cu nos turistanan, esey ta un caracteristica cu ta distingui nos y ta haci nos grandi. Hunto nos lo traha y yega na un solucion y sigui padilanti construyendo un Aruba miho pa nos tur.”
