Hubert Dirks di Compra NV
ORANJESTAD (AAN): Na momento cu e Pandemia a cuminza manifesta su mes rond mundo, e agencianan cu ta importa cuminda na Aruba a anticipa cu tur e interupcion di suministro, di transporte, y subida di prijs lo por bay influencia esaki den tur sector! Sector di transporte, di combustible, di paña y zapato, y sigur sector di cuminda lo bay sinti efecto di inflacion di kizas 2% te cu 3%.
Esey ta loke Hubert Dirks kende ta CEO di e agencia Compra NV a mustra di tabata e trend na comienzo ora cu prijsnan a cuminza subi.
Pero pa sorpresa di tur hende, ultimo temponan e porcentahe di aumentonan a bay asina halto, cu e ta pone hende cuminza analisa y cuestiona, ta con leu mas e prijsnan aki lo sigui subi.
E companianan local a nota cu tur cos cu tin di haber cu proteina (carni, galiña, pisca, etc.) cu ta subiendo y ya caba ta riba di 15% mas caro. Cada biaha cu un cargamento nobo yega e isla, atrobe e invoice di e productonan ta mas halto.
Productonan ta scars tambe: Segun Dirks, ademas cu cada biaha e productonan cu ta yega den container ta birando caro, un otro dolor di cabez ta cu ta birando mas y mas dificil pa haya suministro di e acostumbrado productonan.
“E no ta djis bira hopi caro, pero cu bo no ta haya e productonan mas of facilmente disponible,” Dirks a indica. Casi bo tin di warda extra luna pa e bo ricibi e producto. “E ta un situacion basta preocupante e momentonan aki,” e director di Compra NV a bisa.
Tur esaki ta pone cu companianan local no por planea ta con ta bay finaliza 2022. Aunke den nan caso, Compra NV a manda haci compra di trempan caba pa e Hamnan di Pasco, pues a sigura nan na un bon prijs, pa asina nan wordo transporta y yega na tempo pa December. Hubert Dirks a bisa cu si nan a warda te fin di aña pa busca e Hamnan aki, kizas nan lo mester a paga entre 20% te cu 30% mas hopi pa nan.
Loke Agencianan local tin di haci e epoca aki pa haya producto, ta un reto basta grandi pa logra trece productonan na tempo, y na prijs abao.
Segun Dirks di Compra NV, e ta preocupa pa esnan di menos recurso na Aruba, cu tin cu biba di salario minimo, tin di pensa con nan lo bay paga pa e productonan aki den futuro. E ta kere cu Gobierno tin di yuda den esaki!
Dirks a splica cu e trahadornan di su empresa cu ta biba Pariba di Brug mes, ta gastando mas di 100 Florin extra pa luna awor na gasolin pa nan yega nan trabao te na Eagle. Esaki hunto cu e subida di mas di 15% di cuminda en general, ta empeorando e situacion di bida di trahadornan.
Pakico prijs ta subiendo: Segun Dirks, e productonan a bira mas caro, debi cu e suministradornan (‘suppliers’) a hisa nan prijsnan. Hunto cu esey, e prijs pa cada container pa transporte di alimento tambe a subi substancialmente masha hopi mes. Tur esaki hunto ta pone cu e ‘kostprijs’ di producto ta halto.
No ta berdad cu e Agencia tin extra margen agrega. Hubert Dirks a bisa cu den caso di Compra NV, nan a trata di mantene nan margen den placa igual cu loke nan tin. Pues nan no a bay subi esaki djis debi cu productonan nan prijs a bin halto. E productonan na kostprijs (“CIF-Waarde”) te na Aruba ya ta sky-high.
Kizas tin alternativa: Lo por cuminza busca alimento di otro lugar como alternativa? Aruba mayoria vez ta importa di Merca y di Hulanda/Europa. Kizas pa por yuda baha tur esaki, lo tin di bay check productonan similar for di region, of Sur America.
Pero pa esey socede, e Agencianan na Aruba lo tin di haya cooperacion di Gobierno. Como cu tin di corda cu varios producto di cierto pais ta prohibi pa wordo importa riba e isla. Pero pa awor Gobierno di Aruba mester por a realiza cu prijs di cuminda ta subi sin stop, y kizas algo tin di wordo haci.
