ORANJESTAD (AAN): Varios compania, departamento y institucionnan a cuminsa emiti nan anuncionan relaciona cu e medidanan di Covid-19,
cual Gobierno di Aruba a duna di conoce cu ta wordo elimina.
Un di e institucionnan aki ta Aeropuerto internacional Reina Beatrix cual a laga sa cu AAA N.V. como operador di e unico aeropuerto di Aruba lo mantene tur e medidanan preventivo y di seguridad den tur e areanan restringi (paden di e Edificio Terminal: Imigracion local, Aduana local, Seguridad, US CBP area, tur gate y e area de Concesion Principal) te cu 1 di Maart 2022, cu e meta di sigui proteha su operacion, di tur empleado y viahero.
Esaki ta nifica cu ta recomenda e uzo di tapaboca den tur area di oficinanan, area di facturacion y area di yegada, pero ta obligatorio den tur e areanan restringi menciona anteriormente.
Mientrastanto, AAA ta bay sigui vigila e situacion den mundo di aviacion prome cu modifica e medidanan actual.
Si bo ta un persona cu ta bay viaha of cu ta bay ricibi algun bishita di afo, tene cuenta cu e situacion na aeropuerto di Aruba pa loke ta e medidanan preventivo di Covid-19.
