SANTO DOMINGO: Nan ta cla pa cuminza haci awor vuelonan internacional.
E aerolinea dominicano ‘Arajet’ a bisa cu pa fin di Augustus nan lo cuminza cu vuelonan internacional, net ora cu nan ta ricibi dos avion mas Boeing 737-Max 8. E ora e compania lo tin seis Boeing 737-Max 8.
Presidente ehecutivo di Arajet, esta Victor Pacheco Mendez a bisa cu den menos di un luna, nan lo informa prensa cual ta e prome destinacion cu nan lo bay cuminza bula, aunke el a bisa cu e destinacionnan aki lo bay ta ciudadnan importante den Caribe, Mexico, El Salvador, Guatemala, y Colombia.
El a bisa, cu un flota di avion nobo, e compania lo bay spaar masha hopi mes den jetfuel, mantenimento, y operacion, y lo bay pasa e spaarmento aki na pasaheronan. E avionnan aki ta bula mas silencioso, pues lo no pone hendenan banda di Aeropuerto tapa nan orea.
Tur avion ta saliendo nobo-nobo for di fabrica di Boeing na Seattle, Washington, na Merca. Cu esaki nan kier promove turismo na nivel internacional pa beneficio di e pais. E avionnan lo tin 185 asiento.
Boeing a confirma cu e aerolinea dominicano a haci un pedido di 20 avion Boeing 737-Max, cu e opcion pa cumpra 15 mas despues.
