Accion riba Diaranson mainta
ORANJESTAD (AAN): Ta parce cu Aeropuerto di Aruba tambe a “join the club” cu varios otro Aeropuerto den exterior, unda ta presentando un situacion cu tin falta di trahador.
Esey a desemboca Diaranson mainta den un Walk-Out di personal di Aduana na Aeropuerto. Nan a wordo respalda pa nan Sindicato SADA den esaki.
E biaha aki nan no a protesta riba salario, ni riba asunto di un booth mal poni di Car Rental den sala di yegada. E biaha aki nan kier a expresa nan malcontento cu no tin suficiente personal di Aduana pa cubri e multitud di pasahero cu awor ta pasando den Aeropuerto Internacional Reina Beatrix, despues di e pandemia.
Tin mester di mas Aduanero pa cubri puestonan na Aeropuerto, y esey ta e mensahe cla y raspa cu Diaranson mainta nan a manda pa tanto cabezantenan di Aduana, y tambe pa Ministro y Gobierno en general.
Hecho ta cu Aduana tabata funcionando si tur dia ultimo tempo, sinembargo e ta net na e exigencia minimo. E cantidad di funcionario presente na Aeropuerto no ta suficiente pa por traha mas eficiente cu asina hopi extra pasahero.
Consecuencia di esaki ta cu turistanan tin di para den rijnan mas largo pa asina wordo atendi door di Aduana. Esaki no ta placentero, ni pa e turista, y mucho menos pa e funcionarionan aki.
Algun Douanero ta hasta haya cu e poco funcionarionan presente ta birando un peligro pa nan, si acaso un problema escala entre nan y pasahero. Fuera di esey, e chens ta grandi tambe cu un of otro articulo ‘ilegal’ por pasa drenta Aruba sin cu e ta wordo detecta corectamente. E eficiencia di un control semper ta bira menos, ora cu tin presion enorme riba poco personal.
Aunke ya nan a yega di reclama cabezantenan riba e situacion aki, toch nada a ser haci.
Algun minuut despues, e accion a finaliza, ora cu nan a ser priminti cu aki algun dia lo bay haya un contesta riba e reclamo di loke ta pasando na Aeropuerto. Ohala cu Ministro tambe tuma nota cu loke ta pasando den Aduana na Aeropuerto no ta e situacion ideal e momentonan aki.
