*Ombudsman y abuso di mucha tambe mester traha riba dje
ORANJESTAD (AAN): Na ultimo momento ex presidente di Parlamento Ady Thijsen a dicidi cu e ta bay drenta Parlamento un biaha mas, pues e tambe a huramenta na Cas di Gobernador recientemente.
“Semper pa bo huramenta como parlamentario ta un honor y privilegio pa bo representa bo pueblo y den cualkier funcion den Parlamento”.
Mi a hacie como parlamentario den oposicion, como presidente di Staten y aworaki como parlamentario di e partido den Gobierno, segun Thijsen.
El a sigui bisa cu e generacionnan ta cambia y cu bo tin cu duna e generacion nobo, e hubentud, e sosten y apoyo.
“Mi tey pa duna e generacion nobo esey”.
Bo tin cu wak e asina cu mi ta parti di un organizacion serio y nos ta wak unda bo tin bo balor agrega y den esaki mi balor agrega ta pa mi ta den Staten y pa hunto cu e fraccion di MEP mi por tuma decisionnan importante pa nos pueblo, segun e parlamentario.
El a indica cu semper ta keda e espacio pa den futuro e scoge otro rumbo, mirando cu e ta un persona cu un trayectoria largo caba den politica.
Prensa a puntra Thijsen riba algun di e asuntonan cu como presidente di Parlamento e kier a trata, manera abuso di menor.
El a splica cu durante e periodo cu bo ta presidente di Staten tin algun cos cu bo kier logra y mester tene cuenta cu e hecho cu ta cada aña no por wordo escogi como presidente.
No ta un posicion cu bo ta wordo escogi pe mesora pa 4 aña.
“Cada biaha nan ta escoge bo pasobra nan tin e confianza den bo, pues bo tin cu demostra bo mes”.
Mi mala suerte tabata cu Aruba y henter mundo a wordo confronta cu COVID-19, mirando cu di berdad mi kier a keda cla cu independizacion di Parlamento y mi ta spera cu e presidente nobo sigui cu esaki, pasobra e ta algo importante pa loke ta nos estado di derecho, segun Thijsen.
El a bisa cu e ta spera tambe cu tur cos keda cla rond di e Ombudsman y rond di combatimento di abuso di mucha.
