No tin lugar mas pa wega ni patronahe politico den ningun parti di Trias Politica - Aruba mester nabega den mundo di inseguridad cu Hulanda cu ainda ta forma Gobierno - Casonan criminal den mundo politico di Aruba ta marca exigencianan pa futuro limpi
ORANJESTAD(AAN)- Na un momento historico pa mundo, awe Diahuebs 19 di Augustus 2021 pa 6:00 pm, e partidonan MEP y RAIZ lo firma un acuerdo nobo pa gobernacion, manera a wordo informa Diaranson atardi laat. E firmamento pa Gobierno di 2021 - 2025 lo socede na San Nicolas.
Mientras hopi speculacion ta wordo haci riba contenido di e acuerdo, DIARIO hunto cu expertonan a discuti e base pa gobernacion cu e consultanan di Formador cu tur sector di comunidad a trece dilanti.
Clave den tur mensahe cu a wordo entrega na Formador Evelyn Wever-Croes tabata, cu e temporada 2017 pa 2021 a trece claramente dilanti, cu e sistema politico total di Aruba mester di un cambio cu ta cuminsa cu final di patronahe politico na Aruba, cu ta causante no solamente di falta di placa pa Aruba por a enfrenta e crisis cu a presenta ora Citgo a resulta di ta un fantasia y Hulanda mester a introduci supervision pa medio di CAft pa motibo di e debe nacional y e desaster financiero cu a bira realidad di Aruba for di 2017.
“E lista di casonan criminal, casonan penal cu Husticia mester a atende durante e ultimo añanan aki, ta central den loke Pueblo no kier mira mas,” a wordo trece dilanti.
Democracia ta entrega na gobernantenan e deber di cuida loke ta di Pueblo y no uza loke ta di Pueblo pa nan progreso financiero personal ni pa nan crecemento social of financiero.
Na e momentonan aki, Pueblo di Aruba manera a wordo trece dilanti despues di consultanan cu Formador dor di tur sector di comunidad, kier e siguransa cu gobernacion no ta wordo uza pa politiconan parti loke ta di Pueblo pa nan haya voto ni pa nan bira mas rico, ta e base pa tur gobernacion.
“Aruba no tin espacio pa amigo politico haya puesto den Gobierno y asina yuda fomenta corupcion pasobra ta cu nombracion di amigonan politico den Gobierno, caminda ta habri pa corupcion cu Pueblo no tin placa pa paga,” a wordo indica dor di expertonan.
Den tur conversacion cu Formador, Aruba a papia un idioma cla. Democracia mester haya contenido. Placa di Pueblo mester wordo uza pa Pueblo en general y no pa partidonan haya voto.
Hunto cu expertonan DIARIO a traha un inventario di e momento cu un acuerdo pa gobernacion lo wordo firma awe.
Na e momento aki den Corte tin e Caso Avestruz, cu segun abogado di Benny Sevinger mes, ta duna tur indicacion cu algo malo a pasa aunke e ta defende su cliente Benny.
Den man di Ministerio Publico tin un rapport di loke a pasa cu Refineria di Aruba, un compania di estado di Aruba cu a wordo habri pa trece e refineria di Citgo, cu a bira un promesa cu nunca a wordo cumpli pasobra e tabata un aventura, pero si a haci cu Aruba a prepara pa un temporada di oro cu a a resulta falso.
E caso Ibis, den cual castigo di Huez a wordo pronuncia contra Paul Croes, tambe ta bay ocupa Corte di Husticia den apelacion.
“Aruba no por mas,” a wordo splica dor di expertonan cu ta bisa cu awe por mira con CAft a logra baha gastonan di Gobierno for di 2017, ora Aruba a keda atras cu un debe nacional y un futuro tranca.
“Honestidad politico ta loke Pueblo kier. Trankilidad y e siguridad cu politiconan den Gobierno y den Parlamento ta traha pa Pueblo,” a wordo trece dilanti.
Aruba ta mira formacion di un Gobierno nobo na momento cu ainda no ta conoci cual ta e Gobierno Hulandes cu Aruba mester atende cune den Reino. Den e cuadro aki ta di aplaudi cu Aruba tin un Acuerdo cu Hulanda, pasobra despues di e formacion di e Gobierno nobo Aruba por wordo enfrenta cu partidonan Hulandes cu no ta dispuesto pa comparti placa di Hulanda mas sigur den e crisis mundial.
Ainda mundialmente Covid-19 ta motibo di inseguridad enorme.
Expertonan ta mustra cu pa Pueblo sinembargo, ta keda limpiesa den gobernacion, cu mester tene su mes na leynan pa asina garantisa un futuro nobo pa e pais.
“Aruba nunca mas mester pasa berguensa pasobra sospechosonan ta riba listanan di candidato of den Parlamento,” a wordo trece dilanti.
Pueblo mester haya siguridad cu den futuro ley ta dicidi pa Aruba, cu mester ta un pais goberna cu concenshi pa Pueblo y no den un rio di corupcion y abuso di placa di Pueblo cu a laga Aruba na suela, segun expertonan ta e mensahe mas importante cu formador a ricibi di tur sector cu a acudi na e combersacionnan di formacion.
