Hulanda como atraccion laboral mester coopera den plan total
- Na 2022 lo tabata tin mas cu Trinta Mil Arubano emplea na Hulanda
ORANJESTAD (AAN): No ta awor Aruba conoce problema cu produccion di trahador local.
El a bira un problema real pa Aruba, na momento cu e falta total di planificacion den pasado, cu DIARIO a presenta como peligro, a haci cu e pais ta wordo confronta cu un scarcedad grandi di trahador, cu sigur ta haya expresion den e ramo di turismo.
Sinembargo, no ta awe DIARIO ta cuminsa papia di e necesidad pa Aruba cuminsa atende cu e problema serio di cantidad di trahadornan di origen Arubano na Hulanda, cu no solamente pa Aruba pero pa cantidad di otro pais, ta forma un competencia importante riba tereno laboral.
Na 2022, ya na un forma amplio, DIARIO a splica con e condicionnan social di trabou na Hulanda ta atractivo pa e Arubiano, mescos cu pa Europeonan di e paisnan mas pober y tur otro parti di mundo.
Cifranan concreto ta duna prueba di e forma cu e cantidad di trahador extranhero na Hulanda ta sigui crece y ta forma un problema pa e Hulandes, loke na su turno ta haci cu el a bira uno di e asuntonan mas importante den e circulo politico na Hulanda.
DIARIO a keda traha riba e problema cu Aruba ta confronta riba tereno di scarcedad di trahador, cu a haci cu Ministro Dangui Oduber cu razon a pone un paro na proyectonan grandi di hotelnan.
Informacionnan cu DIARIO ta sigui acumula ta indica cu awor ta e momento pa atende cu e problema aki na Hulanda, caminda e cantidad di trahadornan cu un origen Arubano segun cifranan oficial, ta enorme.
Ora tene cuenta cu na Aruba ta papia di alrededor di 110 Mil habitante y compara esaki cu cifranan cu ta varia entre 25 Mil pa mas cu 30 Mil persona di origen Arubano cu ta traha na Hulanda, ta mas cu claro cu Hulanda y Aruba mester sigui traha riba e problema serio aki.
Nos ta uza aki e palabra “sigui” traha pasobra na 2022 ya DIARIO a duna amplio atencion na e topico aki, despues cu Secretario di Estado Alexandra van Huffelen a papia cu cantidad Arubano cu bon preparacion, pa asina haci nan mas entuasiasto pa bolbe nan pais cu mester di nan conocemento profesional riba tur tereno.
Ora mira e cifranan laboral na Hulanda, no por papia aki solamente di profesionalnan universitario, pero di Arubanonan talentoso y cu conocemento amplio di trabou den tur e sectornan cu na Aruba, ta wordo confronta actualmente cu falta di personal.
Cifranan Hulandes cu DIARIO awor hunto cu expertonan riba nan tereno ta analisa, ta mustra cu esfuerzonan mester wordo haci pa atrae e Arubianonan y yiunan di Arubianonan cu a establece na Hulanda, pa uni na e forza laboral di Aruba, cu ta nan origen y mester di Arubianonan capacita.
DIARIO ta ocupa su mes actualmente cu un estudio profundo di e cantidad di personanan Arubano of segundo generacion di Arubianonan cu a establece nan mes na Hulanda, cu por bira e solucion pa economia di Aruba cu mester di trahador den tur ramo pa e por prospera.
Cifranan y informacionnan concreto lo sostene e esfuerzonan di DIARIO pa yega na solucionnan na un di e problemanan mas serio di un economia, cu ta falta di trahador, cu Aruba a cuminsa soluciona cu e decision di Gobierno Wever-Croes pa pone un paro na entrada di mas proyecto grandi cu exigencia laboral enorme.
