Rubiella Toppenberg di Fundacion FADA:
ORANJESTAD (AAN): Fundacion Anti Droga Aruba (Fada) ta activamente eyfo, specialemene via nan paginanan social, pa manda e mensahe via videonan pa yega na e comunidad. Fada ta keda conscientisa riba conscecuencianan di mal uzo di alcohol especialmente dilanti di mucha. Señora Rubiella Toppenberg di Fada a remarca cu keto bay, ta un problema cu ta pasando.
Hasta durante paradanan di Carnaval di mucha y pa mucha, ta tuma nota cu tin hopi uzo di alcohol mientras cu e mirones di esaki ta muchanan. Y despues tur hende ta subi auto bay cas bebi y no ta cumpli cu reglanan di siguridad di trafico.
Segun señora Toppenberg, si esaki ta loke e muchanan ta wak, esaki ta loke nan ta bay aplica. E comportacion aki di mayornan of adultonan, ta tranca e trabao di prevencion cu Fada ta purba haci. “Nos ta purba di preveni, pero na final di dia, si na cas caba e ehempel ta esaki, kico nos lo spera e ora di e generacion nos dilanti pa loke ta trata alcohol?”, ta loke señora Toppenberg ta cuestiona.
El a agrega cu Fada lo sigui duna informacion. Pa seis luna largo lo pasa videonan di conscientisacion hopi fuerte riba nan paginanan social. E videonan ta contene entrevistanan cu, segun el a menciona, e mes a yora ora el a scucha nan, pasobra e casonan ta hopi serio y doloroso. “Si nos no actua awo, y tuma responsabilidad y pasa e yabi na un persona cu no a bebe y ta un ehempel pa nos muchanan, cos no lo mehora”, señora Toppenberg a enfatisa.
Fada ta invita tur mayor y pueblo di Aruba en general, pa bishita nan paginanan social pa wak e videonan y nan programa di concientisacion.
