Activa
Arubianonan, activa memorianan graba; mentenan, nabega manera boto riba lama crusando cu trankilidad
bay te den profundidad di tur ocean di posibilidad; realisa intensidad di recuerdonan warda
Almanan liber, no limita; lag’e pensamentonan balanza flota riba superficie te na canto di lama
olanan, hib’e memorianan descansa den e barancanan; spierta, suspira, bin bek na realidad
Yiunan di tera, manifesta; activa identidad; habri halanan hancho bula bay, enfrenta forsa di gravedad
no tene miedo, libera; alcansa solemnidad; conkista inmensidad di universo halto aya den shelo cla
Biento, refresca, manda aire purifica; rosea di cunucu, perfuma sentidonan cu fragancia y sensibilidad
curasonnan, inspira, bati duro, acelera; mustra pasion den compas, calor y stimacion pa nos luga
Arubianonan, activa, habri wowonan spiritual; laganan contempla creacion terenal di nos Tata celestial
miradanan, proyecta, refleha divinidad; admira y aprecia maraviyanan natural di nos isla tropical
Solo, ilumina, manda luz di eternidad; rayonan, intensifica color di nos cueronan bon tatua
sernan namora di nos cuna maternal, mustra sinceridad; festeha y venera nos patria inmortal
Yiunan di tera, comunica, laga Papiamento domina; bocanan, proclama palabranan di puresa y bondad
poetanan, expresa; laga frase y versonan destaca; poemanan dedica cu honor y atributo na integridad
Musica crioyo, resona, tumba, danza, mazurka, wals; celebra autenticidad, brasa cultura sin igual
reconoce loke bo ta, activa y conecta; eleva sintimento di orguyo patriotico cu humildad
Arubianonan, exalta, herencia ancestral; lag’e sanger di indjan core den nos benanan cu creatividad
recupera generosidad, cortesia y cordialidad; pinta riba caranan sonrisanan di simpatia y amabilidad
Balora rikesa hereda, keda integra, activa trato igual; respeta diversidad bibando den unidad
tera, sigui draai, nos no por cay atras; pensa riba mañan, avanza buscando prosperidad
Casnan di torto, activa, resalta arkitectura monumental; laga mundo realisa boso grandesa y potencial
historia revela, lucha y tempo sacrifica; pa finalmente alcansa fruta y logronan tan anhela
Piscadonan, enfrenta, turbulencia y tempestad, tuma dominio di lama; bendiciona muchila, boto y taray
cunukeronan, labora, den higr’i solo cultiva; planta y cosecha riba suela cu felicidad
Arubianonan, practica, fieldad y lealtad; duna un man na bo ruman cu ta den necesidad
faronan, lusa cla, camindanan pa bay cas; pasonan, sigura pa lastronan keda atras bon marca
Bandera, waya bay, cu strea ilumina; manda briyo y claridad pa nos baranca tan stima
himno, entona, laga nos recorda; cu Dios por guia y conserva su amor pa libertad
Autor: Jhon Freddy Tobón Montoya
Competencia Literario Poeta di Patria
Aruba 7 maart 2025
