Durante Dia Mundial di Rangernan:
ORANJESTAD (AAN) – Diadomingo cu a pasa Aruba Conservation Foundation, a cuminza cu celebracion di Dia Internacional di Conservacion y nan a haci un Hike na Colony, den un area cu ACF ta maneha, na costa di Sero Colorado. Asina tambe nan a honra e Dia Mundial di Park Rangers.
Asina señor Tyson Lopez, director di ACF a duna di conoce den entrevista cu DIARIO. Cu e grupo cu tabata presente, nan a organiza algun otro actividad, entre otro a haci masahe na oficina, pa tur Ranger cu kier a participa. Riba Dia Internacional di Rangers mes, nan a cera e parke pa mitad dia pa asina por a enfoca internamente, na crea un cultura di union hopi miho. Tambe nan a participa den un tayer di trabao di “Team Building” pa nan tin mas union, miho comunicacion y miho confianza, “pasobra solamente ora nan ta traha hunto e organizacion por bay dilanti, y si e organizacion bay dilanti tambe e conservacion ta bay dilanti” Tyson a expresa.
Pa ultimo nan a celebra e Dia Mundial di Park Rangers riba un catamaran. Finalmente, Tyson Lopez tabata tin un mensahe pa e Rangernan cu a traha pa 21 aña den e Parke, cu a haci hopi trabao y esfuerzo pa esnan cu tey ta para unda nan ta, y esey ta algo hopi importante.
“Loke nos ta haci aworaki mes ta door di dedicacion di otro personanan, cu el a gradici hopi, y cu kizas ta algo cu nunca antes a wordo aprecia. Y pa e grupo nobo cu ta join, el a expresa cu tanten nan tin pasion pa naturaleza, esey ta keda e energia pa lanta tur dia, bin trabao y para pa conservacion y bienestar di e naturaleza”, Tyson Lopez, director di Aruba Conservation Foundation, a conclui.
{gallery}ACF a honra tur Park Ranger, esnan di ayera y esnan di awendia{/gallery}
