Mundo politico Hulandes den ambiente di basta turbulencia serio
*Formacion Gobierno nobo di Hulanda ta enfrenta prueba grandi
*Partido BBB por ta comete suicidio si e laga campesinonan cay?
ORANJESTAD (AAN) — Si Prensa Hulandes semper tin bon bista riba loke ta pasa na Aruba, generalmente publico di Aruba ta menos alerta pa loke ta pasa den e campo politico Hulandes, cu ta uno sumamente interesante.
Sigur despues di e cambionan cu a tuma lugar na Hulanda, cu a duna prueba cu ya e votador Hulandes no ta tene su mes na un partido di preferencia eterno, partidonan ta mucho mas alerta di e rumbo cu nan ta encamina.
Ex Prome Ministro Hulandes, Ronald Plasterk, ainda no a logra forma un Gobierno Hulandes dirigi pa Geert Wilders, loke no ta debi solamente na e reserva di varios partido Hulandes contra e fenomeno Wilders.
E ganador sorprendente di eleccion Hulandes, Wilders, te awor no ta duna prueba di ta perde tereno pero hasta den cierto investigacionnan bou votadornan, ta crea e impresion cu e ta sigui crece como partido preferi.
E victoria di Wilders directamente a deshaci di e posibilidadnan di Pieter Omtzigt, cu a bandona e partido CDA, cu a perde un cantidad considerabel di votadornan na momento cu Omtzigt a bandona e partido Cristian Democrat di Hulanda.
Omtzigt tabata parce di tin victoria electoral den su man, te na momento cu dianan prome cu eleccion, Pueblo Hulandes a uni tras di Wilders.
Esaki a nifica un fin doloroso pa e liderazgo di Mark Rutte, cu a dirigi cuatro gobierno cu su nomber pero finalmente a topa cu un derota electoral na man di e persona menos pensa.
Aunke Mark Rutte mes a dicidi cu e ta bandona politica y no tabata riba lista, su partido a cay den cantidad di voto mescos cu otro partidonan cu a perde votadornan na prome lugar na BoerBurgerBeweging (BBB) cu despues tambe a perde sosten ora Pieter Omtzigt a haci su entrada.
Un Gobierno nobo ta wordo forma y lo ta encabesa pa Wilders, pero te ainda no a bira logro di e formador, cu segun informacionnan di ayera, no tabata presente na combersacionnan cu a continua entre e partidonan, cu tin basta problema cu otro.
Problemanan cu a bira mucho mas grandi, a base di e hecho cu e partido BBB, directamente ta wordo sostene dor di agricultornan cu ta percura pa accionnan violento y castigabel actualmente na Hulanda.
BBB a expresa cu e tin comprension pa e accionnan di e campesinonan cu ta pues directamente mara na su exsistencia como BoerBurgerBeweging (Movecion di Campesinonan y Ciudadanonan).
BBB ayera a nenga pa bay abiertamente contra e accion di e campesinonan den accionnan cu resultadonan pisa pa e ciudadnan Hulandes, caminda nan ta tuma lugar.
Obhetonan ta wordo kima den accionnan di violencia, cu Omtzigt entre otro a denuncia.
Problemanan den e partidonan cu ta negocia un gobierno nobo pa Hulanda na e mesa di negociacion, cu ya a mira un confrontacion entre Wilders y VVD, cu ta e partido cu Rutte tabata dirigi.
Hulanda ta den un suspenso y cu Hulanda henter Reino, na un momento sumamente dificil pa mundo cu problemanan cu ta sigui crece.
Na Hulanda tambe siman di Carnaval ta culmina sigur na e parti Zuid di e pais. Uno di e carteranan grandi di Hulanda A-50 mester a wordo cera pa motibo cu asbest tabata kima, cu tur peliger cu esaki ta encera.
Na Den Haag bida ta sigui cu e Ministronan demisionario ainda encarga cu nan cartera cu nan lo mester entrega na nan sucesonan na momento cu alcansa un Gobierno nobo pa Hulanda.
