Baha gasto di gobernacion di Aruba a cuminsa for di 2017 --- *Josephine Albertus a duna un mensahe cla di accion como arma ---*Pan di hopi trahador na peliger den un crisis mundial serio
ORANJESTAD(AAN)—“Un siman sumamente preocupante ta habro pa Aruba mientras e situacion mundial ta sigui empeora. Problemanan laboral den situacionnan cu por sali for di man, mester wordo evita.”
Palabranan di informantenan preocupa cu te na ultimo momentonan prome cu ciere di e edicion di awe tabata acerca DIARIO pa splica e problemanan serio cu Aruba ta confronta na e momentonan aki.
Manera a wordo trece dilanti, comercio ta biba ainda den un situacion sumamente serio. Como dunador di trabou y garantia mas importante pa placa drenta caha di Gobierno, empresa priva tambe mester mira con e ta confronta e proximo lunanan aki, cu no ta parce di ta nada facil.
Informantenan clave a mustra DIARIO, cu ni salida di 2020 tabata wordo observa cu tanto temor pa suceso inespera, manera ta e caso actualmente.
Na final di 2020 Aruba tabata tin un siguridad, cu 2021 lo a anuncia su mes den un situacion mundial serio.
Na 2021 gradualmente a cuminsa confia cu e situacion lo mehora y un recuperacion a tuma lugar.
Sinembargo, no tin ningun garantia pa loke futuro directo ainda por trece.
Medidanan di emergencia den sector priva a wordo tuma y esaki ta nifica cu sector priva mes mester percura pa su entrada y companianan no tin sosten mas pa paga nan trahador.
Kico esaki lo nifica, lo por conduci na un situacion menos favorabel pa trabou y entrada di personal den sector priva cu Gobierno na e momentonan aki ta trata di evita y ta trata na soluciona.
“Na e momentonan aki den sector priva no tin ningun garantia di mantencion di trabou y e entrada actual di trahadornan,” a wordo splica.
No tin pronosticonan cu no por cambia mundialmente.
“For di 2017 tabata conoci cu medidanan financiero mester a wordo tuma dor di Gobierno, cu no por sigui aumenta belasting pa sector priva y trahadornan di sector priva,” a wordo trece dilanti.
Si sindicatonan kier reuni cu nan miembronan cu ta paga nan pa nan haci nan trabou, ta nan derecho. E hecho cu nan kier tene deliberamente accion Dialuna mainta, ta duna prueba di falta di responsabilidad pa Aruba door di e lidernan sindical, cu asina ta afecta henter Aruba incluso nan propio trahadornan.
Informantenan ta mustra nan rechaso pa loke e lider sindical di Simar, Albertus, a trece dilanti den reunion ora el a indica cu ta mainta mester reuni pasobra e ora e ta afecta Gobierno.
“Loke afecta gobierno lo afecta henter comunidad. E sindicatonan cu kier accion ta keda responsabel pa resultadonan di nan accionnan tambe cu ta perhudica trahadornan cu tin yiu na school y den e situacion dificil di Aruba, ta conoce mas tension,” informantenan a indica.
DIARIO ta pendiente desaroyonan awe a base di decisionnan di Gobierno pa baha e gastonan di personal na Aruba, cu mescos cu tur pais na mundo a wordo afecta pa e pandemia Covid-19, cu ainda no a termina.
Ademas di esaki Aruba mester tuma medida a base di e debenan cu Gobierno Mike Eman a crea y cu un dia Mike Eman a splica cu orguyosamente e pais lo paga tambe.
E forma cu e pago mester tuma awor “orguyusamente” ta, dor di baha gastonan di personal pa asina paga debe hereda y gastonan di Covid-19 a wordo trece dilanti dor di informantenan cu ta mustra cu no por ta cu sindicalistanan di personal di Gobierno kier crea mas problema pa miembronan di sindicatonan den sector priva.
