Sindicatonan SPA y SADA ta garantiza cu lo sigui duna servicio
ORANJESTAD – Ayera mainta tabatin debate interesante den Corte entre abogadonan di sindicatonan SPA y SADA y e huristanan di Gobierno. Gobierno a cuminsa un caso sumario pa Hues prohibi e sindicatonan tene accion contra e medida di 12.6 %. Di parti di e sindicatonan a worde mustra cu nan accion lo no bay perhudica desaroyo na Aruba, manera Gobierno ta pretende. Den e articulo aki DIARIO ta publica e defensa di e abogadonan mientras cu den un otro articulo ta publica e punto di bista di Gobierno y e intermediacion di Hues.
SINDICATO SPA
Abogado mr. Kock di SPA a bisa Hues cu e medida ta un violacion riba e derecho di salario a base di ley. El a señala cu ta un medida temporario di 12.6 % cu Gobierno a introduci na 2020 pero a keda wordo alarga na 2021 y awor na 2022. El a remarca cu no ta asina cu ta Hulanda a impone e medida sino cu ta Gobierno di Aruba a propone e medida di 12.6 % pa baha e gastonan. Na opinion di e abogado, no por ta asina cu 2 aña despues ainda nada. Gobierno ta keda bisa cu no por haci nada. E ta haya cu Gobierno no tin solucionnan structural. No por spera cu SPA ta traha full y ta haya 87.4 % di su salario. No pay, no work. Empleadonan ta traha solamente pa loke nan ta wordo paga. Gobierno a duna comercio e oportunidad pa reduci ora di trabao pa paga e trahador menos pero Gobierno no kier haci esey pa e empleadonan publico. E abogado ta haya cu Gobierno ta viola e principio di igualdad. El a mustra cu Setar y aeropuerto no tin reduccion di salario. E abogado a bisa Hues cu SPA ta garantiza seguridad y orden publico. No por prohibi SPA di tuma accion pasobra nan ta wordo paga menos. Sindicato tin e derecho di tuma accion y no por ta asina cu Gobierno ta prohibi esaki.
SINDICATO SADA
Mr. Rosenstand di SADA a bisa cu e ta haya cu Hues lo declara Gobierno no admisible den su demanda. El a mustra cu e medida di 12.6 % , ta Gobierno a propone y Hulanda a bay di acuerdo y awor Hulanda ta impone pa Curacao y Bonaire. E abogado a bisa Hues cu hopi miembro di SADA tin obligacionnan cu banco y door di epidemia esaki a bira mas dificil. Awor cu kier bin cu medida esaki lo perhudica e empleadonan mas. Tambe el a mustra cu Gobierno a bin cu e medida temporal di 12.6 % pero a keda mantene esaki. Na opinion di e abogado, awor cu Fase a caba, Douane no ta di acuerdo cu mester sigui entrega parti di nan salario. E medida di Gobierno ta relaciona cu e reduccion di personal di Gobierno y no placa cu mester paga bek na Hulanda.
E abogado a bisa Hues cu segun e sentencia intermedio den e caso di Gobierno contra SEPPA y SIMAR, Hues kier mira medida structural y no medida temporal. E abogado tambe a mustra cu Gobierno a duna comercio permiso pa reduci salario pero no pa personal di Gobierno. Esaki ta violacion cu principio di igualdad.
Gobierno no kier reduci oranan di trabao. Tabatin negociacionnan pero no a yega na un solucion. SADA a yama reunion y tur miembro y no miembro a asisti. Hasta e director di Douane tabata presente y a hiba palabra.
Segun e abogado, SADA a notifica hurista di Gobierno cu no a convoca accion. E miembronan di Douane cu no ta miembro, a keda sin traha. Esey ta pa nan cuenta. Gobierno a manda carta Januari 2022 pa director di Douane y ordena pa tur miembro Douane pa traha y esun cu no traha lo tin medida disciplinario.
E abogado ta haya cu ta inhusto cu Gobierno ta envolvi SADA den e caso aki, siendo cu SADA no a convoca ningun accion. E hecho cu Gobierno a cuminsa investiga kendenan no ta traha pa tuma medida disciplinario, ta mustra cu SADA no a tuma accion. El a pidi pa declara Gobierno no admisibel den e caso.
Hues a bisa cu e ta bay studia e caso y 30 Maart 2022 lo por spera sentencia.
