Instagram ta actua contra potretnan cu ta habri porta pa abuso sexual
*Abuso fisico of sexual ta habri porta pa un mucha bira criminal
*Sentencia di Huez na Aruba pa falta di respet pa curpa di damanan
ORANJESTAD (AAN) — Un mucha ta yega su cas bashi, dos hora despues cu porta di school a cera.
E no ta come y ta bay den su camber, si e tin un camber pa su mes den un cas, cu e ta comparti cu su mama y su tata, cu no semper ta su mayornan biologico.
Ta posibel cu e mester yama ruman na otro mucha cu no ta su ruman biologico, pero yiu di e partner di bida di su mama of tata.
E ta yama tanta y omo, abuelo y abuela, na personanan cu no ta su familiares pero a bira su familiares y asina por drenta su cas y atende cune manera nan kier.
Den e situacionnan aki, e no tin ningun hende pa confia su secreto grandi.
E “omo”cu ta encarga cu su transportacion di school pa cas, ta tuma tempo pa transporte pa un mundo di horor carga cu abuso di su curpa.
Amenaza cu morto si e mester habri su boca, e mucha no tin ni mama of tata pa e confia.
Esaki ta uno di e situacionnan cu ta wordo presenta na DIARIO pa informantenan cu kier a mustra con abuso sexual di mucha, di dama y di tur cu bida ta haci dependiente di otro hende, ta bira un forma di bida normal.
Segun e informante ta imposibel pa haci awe un inventario, di cuanto caso di abuso sexual a tuma lugar den silencio y a laga heridanan atras cu a destrui bida di hopi hende, cu nunca a expresa nan sufrimento.
E hecho cu awor comunidad a expresa su mes contra tur tipo di abuso cu ta bira parti di publicidad, ta haci cu victimanan ta comprende cu loke ta pasa cu nan no ta normal y cu nan mester protesta.
Ta protesta y e buskeda creciente di yudansa, ta habri porta pa pone un punto final na abuso fisico y sexual, cu segun expertonan ta transforma e base di moral di victimanan continuo, cu na nan turno ta crea un mentalidad criminal.
Mucha ta uno di gruponan den comunidad, cu ta bira victima di abuso sexual entre tanto abuso cu mundo conoce.
Tin deficiencianan mental of situacionnan cu ta haci, cu hende tin placer den mira otro sufri y ta causa otro dolor cu of sin abuso sexual.
Respet pa e ser humano ta parti di e pakete di normanan y balor di un comunidad y asina ta determinante pa loke ta tuma lugar den comunidad.
Mientras comunidad ta papia mas di abuso di hende debil pa su sexo, cu posicion social, su realidad di bida, sociedad ta habri porta, pa e solucion mas grandi cu e casonan aki conoce cu ta e hecho cu hende ta realiza, cu abuso no ta un parti normal di bida.
Hende ta cuminsa defende su mes na prome lugar pa medio di expresion. E miedo cu si e papia, su bida ta na peliger, ta haci cu e ta busca sosten.
Cu hopi cambio den sistema familiar, school a bira uno di e lugarnan cu muchanan ta busca nan refugio.
Adultonan cu pa nan sexo of condicion di bida ta bira victima di abuso di tur tipo, mas y mas ta busca nan refugio cerca autoridad.
Prueba a wordo duna di esaki recientemente den Corte di Husticia, caminda un homber a wordo sentencia na castigo di prison, pasobra na un lugar publico, e no a respeta e curpa di damanan y a mishi cu nan na lugar publico.
No solamente na Aruba, accion ta bira realidad contra abuso di e ser humano, cu inventonan moderno a haci mas facil.
Durante e siman cu ta termina awe, a bira conoci cu Instagram ta introduci awor un medida mas pa proteha muchanan di abusadornan cu ta haci uzo di medionan moderno di comunicacion.
Imagennan cu por ta pornografico, ta perde nan grado di visibilidad ora nan aparece como imagennan riba artefactonan di muchanan, cu segun nan fecha di nacemento, por wordo identifica como mucha.
E posibilidad pa adultonan tambe haci uzo di e sistema aki, ta presente, loke sin duda lo reduci e cantidad di victimanan di actonan basa riba informacionnan pornografico cu ta wordo distribui a base di abuso di leynan existente pa proteha hende.
DIARIO ta continua cu su tarea periodistico riba e tereno tan importante aki. Esaki mas ainda a base di e forma cu publico di Aruba, ta entrega na DIARIO su experiencianan amargo pa yuda evita cu mas victima ta wordo crea.
