PHILIPSBURG: Huez na St. Maarten a baha pisa riba un homber y un muher, kendenan ta meti den caso di abuso sexual di muchanan menor di edad.
E homber Bernard Stroud di 52 aña, a wordo sentencia na 17 aña den prison. Su amante cu ta ex-Secretaria di Scol, esta e muher Joy Walters, a ricibi un castigo mas halto cu e diez aña cu Fiscal a exigi. Huez a considera cu a wordo proba cu e muher mes ta un persona cu mente putri, envez di ta un victima, y a condena e muher di 34 aña di edad na castigo di 13 aña den prison.
E victimanan tabata mucha muhernan di entre 5 y 11 aña di edad. Nan tabata wordo abusa sexualmente na varios ocasion, of asalta den e cas di Bernard Stroud y su casa (kende tambe ta sospechoso den e caso). Dos cas mas leu riba Belvedere Road, e muher Joy Walters ta biba. E tabata e tempo ey Secretaria di Scol, unda tur e victimanan tabata bay pa haya les. Walters tabata duna bijles na su cas. Tin biaha e muchanan ta pasa anochi cune den su camber, y e tabata hiba e muchanan pa Bernard Stroud y su casa. A sali na cla cu Bernard ta hinca den e triangulo di amor aki pa varios aña.
Segun abogadonan di Stroud y Walters, e declaracionnan di e muchanan haci na Polis y tambe na Huez Comisario, no ta confiable. E muchanan kizas a cuadra nan declaracion. Pasobra no tin ningun prueba cu e muchanan a wordo abusa sexualmente door di Stroud y Walters. Abogado tabata pidi pa Corte laga nan liber.
Pero aunke e homber a keda desmenti su culpabilidad, toch segun Huez tin suficiente prueba cu ta sostene su culpabilidad, y nan modus operandi a bira hopi claro den e tratamento den Corte. Hasta contesta cu e muher a duna Huez, a incrimina su mes. El a confirma cu e tin un piercing di lenga, y aki tin declaracion duna door di un victima, cu ora e muher a lembe su parti intimo, esaki a causa dolor inmenso debi na e piercing di lenga.
Ademas di e castigo halto, tanto e homber y muher tin di paga un compensacion di 50.000 Florin na un di e mucha muhernan. Ta e mucha muher ey a bay confesa na un empleado di scol ta kico ta pasando, y asina Polis a bin haya sa di e crimen di e dos personanan aki.
E potret aki ta di e famoso edificio di Corte na St. Maarten.
