Keto bay ta nenga permiso pa duna concierto
ORANJESTAD (AAN): Como 24 ora prome cu su concierto a tuma lugar na Aruba mey-mey di luna di Juni 2022, unda organizadornan a busca tur vergunning y cana nan caminda na tempo, toch e concierto na un forma abrupto a keda cancela ora cu Cuerpo Policial di Aruba a rechaza di duna e permiso pa e evento tuma lugar.
Polis no a duna ningun motibo pakico esaki a wordo cancela, sinembargo ta conoci cu autoridadnan tin temor cu cosnan fo’i sla y di embergadura grandi lo por socede durante e concierto pa hubentud.
Esaki a desemboca cu na Hulanda tambe un concierto di Rich Kalash a wordo cancela, como cu e promotor di e concierto a cuminza haya dudanan.
Awor ta na Curaçao diripiente tambe e Cuerpo Policial di e isla ta cuminza mustra di lo no bay duna permiso pa e siguiente concierto di Rich Kalash eynan.
A base di esaki, mientras tanto e abogadonan di e artista Curasoleño aki a emiti un boletin unda nan a mustra nan preocupacion con tur e procesonan aki ta andando, y cu den corto nan ta pidi pa sinta na mesa cu Ministro di Husticia na Curaçao y/of e autoridad designa di e isla, unda tur e turbulencia encuanto permiso di evento a cuminza. Nan kier yega na un solucion.
Nan kier haci esaki, como cu no solamente na diferente ocasion nan permiso a wordo nenga, pero cu awor tin indicacion fuerte cu Cuerpo Policial di Curaçao tin intencion di sigui nenga tur peticion relaciona cu conciertonan di Rich Kalash den futuro.
Den nan punto di bista, esaki ta inhusto y nengamento di permiso tabatin consecuencia serio pa e carera musical di e rapper Rich, pero tambe pa su libertad y desaroyo como musico.
E nengamento di permisonan na Curaçao, a pone cu awor tin efecto den Reino Hulandes completo. Y e abogadonan ta nenga di kere cu autoridadnan ta dispuesto pa perhudica artistanan local di e forma aki, incluyendo Rich Kalash cu kizas ta e rapper mas grandi cu Curaçao a yega di conoce.
Recien tabatin hopi comentario riba Social Media unda hobennan ta defende e rapper aki, y ta lamenta cu autoridadnan ta ‘corta su halanan’ di e forma aki. Tambe tin otronan cu ta kere cu si acaso e rapper stop di canta over di topiconan violento, kizas e tolerancia di autoridadnan lo por cambia un poco.
Te ainda no a tende nada di autoridad di Curaçao, si acaso nan tin intencion di sinta na mesa cu e abogadonan- y cu e rapper Rich Kalash.
