E no ta conta pa tur otro persona cu tin otro tipo di salario
*Aumento di salario ta conta solamente pa esnan cu ta cobra salario minimo
ORANJESTAD (AAN): Tur ora cu salario minimo ta subi aki na Aruba por mira hopi reaccion. Tin reaccionnan positivo y esaki ta bin mas tanto di esnan cu ta haya salario minimo. Tambe tin elogionan di parti di gobierno pa e hecho cu lo subi salario minimo.
Na otro banda tin sector comercial, e gremionan, cu den algun caso no ta mucho contento pasobra salario lo subi y lo mester pone placa acerca pa esnan cu ta cay den e grupo aki cu ta cobra 'minimumloon'.
Sinembargo, mester ta sincero y honesto den henter e asunto aki. Sector publico, esta gobierno, mayoria di e empleadonan ta haya bevoordering basa riba nan schaalering y nivel di estudio, generalmente cada dos aña. Tin cada tres aña.
Mientrastanto, den sector priva, esaki ta pio ainda. Si un compania, nan trahadornan no ta afilia na un sindicato unda tin un contrato colectivo por escrito, e asunto di aumento di salario ta practicamente inexistente.
Realmente, cada dos pa tres aña un doño di compania mester sinta y revisa e salario di su trahadornan y aumenta esaki segun e analisisnan di costo di bida y inflacion, tanto local y internacionalmente.
E aumento di salario minimo ta pa solamente esnan cu ta cobra salario minimo. E no ta conta pa tur otro persona cu tin otro tipo di salario.
Esaki ta nifica cu e aumento di salario na Aruba no ta algo igual pa tur hende ya cu no ta tur persona cu ta gosa di un salario lo haya e beneficio aki.
Lo ta un bon momento pa gobierno haci un analisis di e asunto aki na nivel nacional y laboral teniendo na cuenta e desigualdad cu ta existi pa loke ta salarionan, principalmente den sector priva.
Na otro paisnan, ora cu salario minimo ta subi tambe ta subi den un porcentahe kisas of casi igual pa e resto di e sector. Esaki ta trece menos mal contento cerca e trahadornan y ta motiva nan mas ya cu esnan cu no ta cobra salario minimo tambe lo bay dilanti.
A yega ora, pa inclui e tema aki den e discusion y tuma un decision mas husto pa e sector laboral aki na Aruba.
