Parlamentario John Hart:
ORANJESTAD (AAN): Parlamentario John Hart di AVP, a haci un peticion na Presidente di Parlamento, Marlon Sneek, pa yama Minister di Husticia, drs. Arthur Dowers y Minister drs. Rene Herde bin Parlamento pa un reunion publico hunto cu expertonan den e area di energia. Sr. Hart a pidi e minister encarga cu energia splica kico ta e accionnan cu a tuma te cu awor conforme e mocion cu a pasa den Parlamento na augustus 2025.
E mocion cu Parlamentario Hart a presenta y cu a ricibi sosten den sala di parlamento ta urgi gobierno di Aruba pa inicia un investigacion completo riba tur acontecimento cu a tuma luga den RDA for di 2018 te cu 2025. E investigacion mester cuminsa den 3 luna y su resultado mester bin parlamento, pa finalmente duna claridad y responsabilidad na pueblo.
Parlamentario Hart a splica cu, despues di hopi aña di incertidumbre, pueblo y parlamento ainda no a haya claridad riba acuerdo y condicionnan cu a tuma luga entre RDA y Citgo. Nos por corda cu Gabinete Wever-Croes I y II a anuncia varios proyecto (desde refineria modular te cu planta LNG) pero nunca parlamento a ricibi documento oficial, ni condicionnan di acuerdo.
Entre tanto, e refineria y su mancamp a keda cay den estado di deterioro, sin cu ta haci esfuerzo pa preserva ekipo y infrastructura segun normanan internacional. Na final, Parlamentario Hart a declara: “Ta inaceptabel cu despues di tanto aña nos pueblo no a haya transparencia, p’esey ta mi deber pa busca e claridad aki pa pueblo di Aruba.”
