Tur luna ta eherce control cu mas enfoke riba sector di construccion:
*Ya caba a imparti na boet mas cu 100 mil florin!
ORANJESTAD (AAN) – Director di SVb, Edwin Jacobs, a menciona den entrevista cu DIARIO, cu tur luna SVb ta eherciendo control fuera di oranan di trabao, y esaki ta bayendo bon den sentido cu nan ta topa cu mas di 30% di trahadornan, na pia di trabao, cu no ta asegura via SVb.
“Proximamente nos lo ta lanzando un app pa nos aseguradonan, y cu esey e trahador ta bay haya acceso directo na informacion di SVb. Experiencia den region ta mustra cu ora den otro paisnan a introduci e tipo di aplicacion aki, cu e trahadornan ora nan a ripara cu nan no ta asegura, y por mira awo cu e cantidad di trahado asegura a aumenta.
Aworaki, cu nos a bin introduci e aplicacion aki pa trahadonan na Aruba, un grupo di trahado cu ta kere cu nan ta asegura, pasobra e doño di trabao tin cu haci esaki, si nan ta ripara cu esey no ta e caso por denunci’e na SVb y SVb ta tuma e paso pa percura pa e trahadornan ta asegura.
“Mi tin cu bisa cu nos enfoke den esaki ta companianan di construccion. Nos ta mira cu hopi construccion ta tumando lugar y for di aki mi ta haci un yamada na tur compania, na tur proyecto grandi, si nan por duna nos un man door di concientiza y haci un apelacion na contratistanan cu ta traha cu nan, pa percura pa nan trahadornan ta asegura na pia di trabao, y controla esaki pa wak si ta posible y evita pa ora nos yega, nos tin cu haya nos ta duna boet”.
Jacobs a sigui splica cu e boet ta minimo 1500 florin; den un control, un par di tempo pasa, den un solo shot SVb a imparti mas cu cien mil florin na boet. “Nos no ta desea esey, pero si nos constat’e nos tin cu actua conforme ley”, Director di SVb a conclui.
