Dr. Joel Rajnherc, director
*Casi ningun pashent cu tin problema di retina ta bay afo mas
*Ya caba ta buscando un di dos specialista di retina
ORANJESTAD (AAN): Director di Instituto Medico San Nicolas (ImSan), Dr. Joel Rajnherc a duna di conoce cu un di e cosnan cu semper a bisa cu mester haci ta busca manera di reduci e cantidad di pashent cu ta bay afo pa tur sorto di malesa relativamente menos grave cu por wordo trata tambe riba un isla chikito manera Aruba.
El a bisa cu den e departamento di wowo tabata tin hopi caso cu ta bay afo y cu si tin specialista y e ekipo adecua por haci'e cu hopi facilidad na Aruba. Esey tabata, basicamente, e vision for di e comienso.
Na comienso tabata tin 1,5 doctor di wowo na ImSan. Awor despues di 10 aña tin 5 doctor di wowo trahando pa ImSan henter dia. Tin D. Jacobs cu ta traha hunto cu nan y ta un orguyo, a bisa, di wak con 6 specialista di wowo ta traha hunto. Cinco aña pasa, Dr. Rajnherc no lo a kere esaki.
Dr. Rajnherc a splica cu casi ningun pashent cu tin problema di retina ta bay afo mas. Antes tabata alomenos 80 pashent anualmente cu lo mester a bay Colombia. Awor tin mas cu 160 pashent na Aruba mes y ya caba ta buscando un di dos specialista di retina na Aruba.
Tin un specialista di glaucoma y niun di e pashentnan ey ta bay afo mas tampoco. Esey no solamente ta spaar hopi placa pa Aruba, pero ta duna e pashent e beneficio cu e ta wordo trata den su mesun famia. 'Eigenlijk esey ta mitad di bo recuperacion caba cu bo lo mester, e apoyo di bo famia", a bisa.
Dr. Rajnherc a laga sa cu e ta hopi orguyoso y tin hopi mas pa haci ainda. Ta bezig trahando riba e 'business case' pa e desaroyo bay mas leu ainda, cu ta menos pashent atrobe cu no tin cu manda afo. "Petje af pa e grupo di specialista, pero no solamente pa e grupo di specialista. Tur nan onderstuining personeel manera e optometristanan. Pero tambe e secretarianan, telefonista (...)".
E medico a laga sa cu na Aruba tin hopi pashent di wowo. Mas di loke por maneha ye problema ta cu e prome linea di cuido ainda no ta suficientemente profesionalisa pa por duna un gran apoyo. Esaki ta biniendo, pero no ta unda e mester ta ainda, a remarca.
