Premier Evelyn Wever-Croes:
*Cu aumento di BBO ta bay tin control mas riguroso
ORANJESTAD (AAN): Manera a wordo anuncia, entrante 1 di januari 2023 ta bay introduci un aumento den e impuesto di BBO y relaciona cu esaki, a puntra Prome Minister Evelyn Wever-Croes, si ta bay tin algun mecanismo di control pa asina evita cualkier abuso cu por sosode.
E mandatario a duna di conoce cu dos control por tin. Tin e control di belasting mes, ora di bay controla e bukinan y a aangiftenan cu ta drenta tur luna unda ta mira cu e hendenan ta paga loke nan tin cu paga. Tambe tin control di prijs.
Wever-Croes a sigui bisa cu eynan tin cu bay controla y haci e control hopi mas riguroso y intenso pa por ta sigur cu no tin abuso ta tumando lugar.
Prome Minister a laga sa cu a pidi Minister Geoffrey Wever tambe pa pone mas atencion na mas control intensivo. El a agrega cu prome cu Covid tabata tin controlnan multi-disciplinario. A institui un maneho unda Departamento di Asunto Economico a bay hunto cu Departamento di Salud, cu ta controla otro aspectonan, por ehempel den un supermercado.
El a sigui bisa cu cada supermercado tabata haya control un biaha pa luna. E tempo eynan tabata tin basta publicidad cu tabata wordo duna tambe na e controlnan ey.
Door di Covid mester a stop cu ne pasobra tabata tin mester di tur hende pa yuda atende cu e control di Covid y ademas di esey tabata tin 'shelter-in-place', entre otro, a indica.
Pero a pidi pa bolbe reactiva e controlnan multi-disciplinario y regular. Si por tur lugar mester haya su control alomenos un biaha pa luna.
E realidad ta keda cu e control di prijs ta limita na solamente e productonan di e canasta basico pasobra na Aruba tin un sistema di 'Free Enterprise' y no tin un sistema cu por controla tur prijs di productonan di luho cu no por controla, a señala.
"Eynan e ciudadano mas conciente y critico por hunga un papel hopi importante. No ta pasobra un lugar ta cerca di bo cas, necesariamente eynan so bo ta cumpra. Bo tambe por puntra, bo tambe por busca mas aleu", a expresa.
