Parlamentario Rocco Tjon:
ORANJESTAD (AAN): Ya for di basta siman pasa e traspaso tawata cla pa ambos Minister, pero door cu formacion a tarda no por a haci e traspaso prome. Ta siman pasa esaki a tuma lugar bou un aire positivo caminda a duna e siguiente ministernan tur documento, map y dossiernan, pa asina nan por "ranca sali".
TRASPASO NA SR. DOWERS Y SRA. WYATT RAS
Diahuebs y diabierna siman pasa mi a sinta cu sr. Dowers y despues cu sra. Wyatt-Ras y a duna ambos un rondleiding di tur e oficinanan caminda personal tawata sinta, pa asina e por a tuma nota cu tur oficina a keda cu mueblenan, computer y telefon.
Tambe a duna sr. Dowers, hunto cu su consehero, un splicacion amplio di e diferente puntonan di urgencia. Alabes e a haya tur documento, map y ordners cu ta contene tur informacion necesario.
Pa loke ta trata sra. Wyatt-Ras mi a sinta hunto cu dos di mi conseheronan riba e tereno social y salud mental, y a dune tur informacion, documento y dossiers.
PA CONCLUI
Nos a bisa ambos minister cu mi team ta dispuesto pa brinda informacion si esey ta necesario e temponan nos dilanti. Mescos ta conta pa mi persona, si tin cualkier pregunta, semper mi ta dispuesto pa splica.
Ta desea ambos Minister sabiduria, pasenshi y hopi exito. Nos lo hiba un oposicion fuerte pero semper husto y basa riba hecho.
