Minister Tjon ta papia di un bon reunion cu SMAC:
* Cu e kier a investiga SMAC no ta e caso!
ORANJESTAD (AAN) – Den entrevista cu DIARIO, Minister di Husticia, señor Rocco Tjon, a duna di conoce cu el a reuni cu e bestuur di SMAC, y a combersa cu Darren Van Ommeren. E dignatario a expresa cu esaki tabata un hopi bon reunion, hopi positivo, y el a comenta tambe cu locual a sali den noticia no ta cuadra completamente.
“Berdad ta cu mi persona a manda un mail pa Alto Mando y KPA. Den e caso aki, tabata tin hopi keho (diabierna) di personanan, di fundacionnan, di scolnan, cu Cuerpo Policial ta nenga un vergunning, pa nan por a organiza un actividad door cu e no tin un stempel di SMAC Mi por compronde e parti di e organisadornan, e parti logistico, di con mester tin stempel. Pero mi a bisa KPA den e caso aki, cu den Ley ta stipula ki ora un persona por haya un vergunning si of no, y ni un caminda den ley ta poni cu nan mester di un stempel di SMAC, den e caso aki. Pues, esey no ta un motibo valido pa nenga e vergunning. Cuerpo policial a compronde, y esey tabata e indole di e mail cu mi a manda”, Minister di Husticia a indica, agregando cu no tabata algo pa investiga SMAC, esey no ta e caso.
El a subraya cu esey no ta su tarea como Minister di Husticia, y nunca el a pidi un departamento pa haci un investigacion, esey ta di e departamentonan mes.
