ORANJESTAD (AAN): Diabierna un biaha mas tabata un dia cu no a duna les na scol di HAVO y VWO na Vondellaan.
Tabatin un grupo di alumno bisti tur na preto kendenan si a presenta mainta dilanti Colegio Arubano como sosten pa Rector Tim Croes, kende na comienzo di siman a wordo suspendi door di President Ernesto Rozenstands di Fundacion SVOA, pa motibonan aparentemente hopi debil.
Mainta tambe, Mayornan di alumnonan a presenta dilanti Scol y a pidi esnan di SVOA bay ricibi un carta. Pero SVOA a nenga y e ora e Mayornan a lesa esaki pa tur hende tende. Despues nan a drenta pa entrega esaki na SVOA, pero ningun hende kier a habri porta pa nan.
Mientras tanto, e partidonan a bay sinta na mesa y for di mainta trempan tabatin reunion, y esaki a finaliza te casi 6:30 pm. Y e informe principal ta cu e suspension di Tim Croes a wordo revoca, pues e tey bek como Rector.
Sindicato Simar a emiti un boletin pa bisa cu e situacion cu Rector a wordo resolvi. Tim Croes tey bek den su puesto. Reunionnan lo sigui pa asina sigui drecha tur punto- y demas obstaculo den caminda.
