Ministro Geoffrey Wever:
ORANJESTAD (AAN): Parti di vision di maneho di minister Geoffrey Wever ta pa Aruba por tin datos confiabel, di calidad y accesibel. Usuarionan di datos manera publico en general local y internacional, sector priva, mundo academico, studiantenan, parlamento y gobierno tin necesidad na diferente datos.
Pa cu esaki minister Geoffrey Wever, a traves di Centraal Bureau Statistiek y e Comision di Sistema Nacional di Estadistica, ta implementando un Sistema Nacional di Estadistica (National Statistical System (NSS)) y a haci na final di 2023 compra di e hardware y software necesario na balor di alrededor di 1 miyon Florin. E fondonan pa esaki a bin di e kapitaalinvestering di 2023 di Pais Aruba y fondonan di Hulanda por medio di e Landspakket. Hulanda a pone Afl. 1.459.800,00 disponibel pa yuda Aruba den implementacion di e Sistema Nacional di Estadistica.
E Comision di Sistema Nacional di Estadistica bou guia di Centraal Bureau Statistiek ta haciendo diferente trabao pa implementacion di e Sistema Nacional di Estadistica (NSS)). Un di e partinan esencial di implementacion di e Sistema Nacional di Estadistica ta e ‘Digital Data Platform’ y e ‘Data Dissemination Platform’. Den 2023 un audit a ser haci di e diseño di e infrastructra di ICT y di e hardware y software necesario pa e infrastructra di ICT ta conforme e necesidadnan di un Sistema Nacional di Estadistica. Den e ‘Digital Data Platform’ datos di diferente fuente lo worde treci hunto di manera safe y analisa pa por produci estadisticanan oficial. Pa e ‘Digital Data Platform’ ta necesario pa cumpra hardware y software.
Un otro parti esencial di implementacion di e Sistema Nacional di Estadistica ta e parti legislativo. Dentro de poco e concepto di ley di e Sistema Nacional di Estadistica lo worde entrega na Conseho di Ministronan.
“Mi ta contento cu e progreso di implementacion di e Sistema Nacional di Estadistica (NSS) y ta agradece e Comision di Sistema Nacional di Estadistica pa e trabaonan haci. E Sistema Nacional di Estadistica (NSS) ta un tool importante y moderno pa por garantisa datos di calidad y accesibel pa tur usuario di datos pa nos traha pa un mihor Aruba”, Minister Geoffrey Wever a termina.
