ORANJESTAD (AAN): Pa prome biaha, e islanan Aruba, Bonaire, y Curaçao lo bay tin un data-base independiente di registro di microchip pa animalnan, y esaki ta un logro di e asina yama Kitten Rescue Curaçao Foundation.
Siman pasa a lansa e website di chippen-caribbean.com ya cu esaki lo bira e data-base independiente di registro di microchip di e islanan ABC, unda e propietarionan di mascota, veterinario, fundacionnan, y otro organisacion por registra y lesa numbernan di chip di cachonan, pushi, y otro animalnan. Si bo haya riba caya un mascota perdi cu chip registra, bo por localisa e doño facilmente via di e website di chippen-caribbean.com.
E consulta di e data-base aki ta (y lo sigui di ta) gratis. E registro di mascotanan via di e propietarionan tambe ta gratis, te cu 10 animal pa cada cas. E registro di chip di parti veterinario, fundacion, y otro organizacion ta gratis durante e prome aña di introduccion. Despues di esey lo bay cobra ochenta dollar pa un cantidad sin limite di registro.
Chippen-caribbean.com a wordo crea door di un iniciativa di Stichting Kitten Rescue Curaçao den colaboracion cu e suministrador hulandes 0318BV, cu ta aporta mas di 25 aña di experiencia den e identificacion di mascotanan. E data-base nobo a wordo crea door di nan, segun e rekesitonan di seguridad di gobierno Hulandes y legislacionnan riba privacidad, loke ta garantisa cu e datonan personal ta sigur y nunca lo wordo poni disponible na tercer parti of institucionnan gubernamental.
“Di hopi tempo caba mester a bin cu un solucion independiente y profesional pa registro di animalnan riba e islanan ABC,” ta loke Marcel Bleeker a bisa, kende ta vocero di e fundacion. “Como fundacion nos a tuma e iniciativa aki pasobra awendia ya bo no por dicidi simplemente ki destino bo ta duna e animalnan registra, sin consulta prome cu e propietario. Ademas, den futuro lo bay ta mas facil pa haya e doño di un animal cu a perde of haya accident. Pues abo como doño awor bo por encarga di awor caba door di pone un chip riba bo mascota y registra esaki na chipping-caribbean.com
