Prome Minister Evelyn Wever-Croes:
ORANJESTAD (AAN)- Prome Minister Evelyn Wever-Croes, durante conferencia di prensa di Gobierno di Aruba a elabora riba e aumento cu Gobierno a duna trahadonan di fundacionnan subsidia pa Gobierno. E total exacto di trahadonan na e fundacionnan aki no ta conoci, mirando cu e pago di salario ta wordo haci pa e mesun fundacion y no pa gobierno, pero ta trata aki di un averahe di mas o menos 1000 persona cu lo bay haya un aumento basa riba e indexering. Pa cu esaki Gobierno a aloca 5.8 miyon florin pa 2024, y 20.6 miyon florin pa 2025.
Pa loke ta e trahadonan, Prome Minister a indica cu varios di nan a expresa di no a haya e aumento aki ainda, y p'esey ta manda un apelacion na e fundacionnan pa traha e carta cu e montante necesario, y mande pa e minister concerni pa aprobacion. Unabes cu e peticion wordo aproba, e lo wordo manda Directie Financiën pa asina nan por procesa e pago.
Mester menciona si, cu debi cu e Gobierno anterior a cambia e sistema na unda cu no ta duna subsidio di salario mas na fundacionnan sino un "output subsidie", ta pone cu e proceso nobo aki, na unda ta aloca fondo pa e trahadonan di e fundacionnan, ta tumando su tempo y no ta canando lihe manera desea.
"Mi sa cu e proceso aki ta pega, y mi a papia cu sindicato caba riba e tema aki. Mi ta spera nos por soluciona e retonan cu tin na caminda pa asina duna e fundacionnan, specialmente esnan mas vulnerabel, e placa pa asina nan por paga nan trahadonan" Prome Minister a expresa.
{gallery}A aloca 5.8 miyon florin pa 2024, y 20.6 miyon florin pa 2025, pa aumento di salario di empleadonan di fundacionnan subsidia pa gobierno{/gallery}
