Julie Wever, Director FCCA:
*FCCA ta enfoca hopi riba adulto mayor
ORANJESTAD (AAN)-- “Pa FCCA tur grupo ta importante, pero nos data ta mustra cu 70% di e peticionnan cu nos tin pa un cas, ta hende di 55 aña y mas”, segun señora Julie Wever, Director di FCCA.
El a indica cu 50% ta hende di 65 aña y mas, pues ta duidelijk cu hende grandi ta esnan cu mas a pidi pa e casnan. “Esey no ta kita cu nos ta traha pa tur grupo, pues aworaki mes, den Wilhelminastraat nos ta bezig cu 21 apartamento pa studiante.
FCCA ta keda enfoca riba tur e gruponan, pero nos ta pone enfasis, den e aña venidero sigur, na e adulto mayor”, señora Wever a señala.
Ademas FCCA kier ta parti di e solucion pa e profesionalnan cu a studia afo y kier bolbe Aruba, pero nan kier asegura un vivienda.
“Tambe e analisis cu nos ta haci ta mustra cu bo tin cu mix bo barionan cu diferente edad, pa bo tin un bario mas den balansa y bisando esey tambe, djis e adulto mayor cu e habitantenan jong, eigenlijk, a caba di cuminza tambe ta un reto y nos tambe kier ta parti di esaki”, señora Wever a señala, y a indica cu FCCA mes ta cuida e casnan.
El a agrega cu FCCA tambe tin cas cu ta na huur door di otro management, cu ta haci mas pa e cuido tambe. FCCA no tin e ekipo di cuido, pero si tin beheerdernan cu ta social, anto nan ta e prome cu ta wak si tin algo, pa nan por notifica, sea un Sociale Zaken, of un otro instancia cu si tin contacto cu ne, pero no cu nan tin un ekipo cu por haci e cuido na e momento.
Dentro di e plannan cu FCCA tin, señora Wever a menciona 50 cas cu nan ta preparando na Cas Paloma, cu ta pa adulto mayor. Tambe ta preparando un Master Plan na Rooi Congo, cu ta consisti di 150 cas cu tambe ta pa adulto mayor. Den esakinan, pa mi locual ta important, cu tambe por wak den e proyecto di Boegoeroei, pa e adulto mayor por recrea mas pafo pa e calidad di bida pa nan, tambe ta mas halto”, señora Julie Wever, Director di FCCA a relata.
