Na final di e prome luna di e segundo mitar di 2023 un pregunta
*Clima ta menasa den un ambiente di guera y weganan Olimpico
*Petroleo mester bay pero con e lo dicidi cu e mester bay?
ORANJESTAD (AAN) —Prome cu Covid-19 a haci su entrada na 2020, mundo a presta hopi atencion na 2025, 2030, 2050.
Cifranan bunita pero mundo a lubida riba un aña cu pa un motibo of otro mester tabata insignificante.
Augustus 2023 a haci su entrada pa recorda mundo, cu e prome luna di e segundo mitar di 2023 ya a yega su final.
Kico ta spera mundo realmente den loke a resta di 2023, cu mester a hiba mundo na un normalidad despues di e Pandemia Covid-19?
Ainda mundo ta lucha cu su mes pa no bisa cu cierto plannan cu el a traha pa su futuro ta bira cada dia mas dificil mientras hende tin problema cu hende pero tambe cu clima y realmente tur loke ta rondona hende of hende a pensa cu ta hende ta dirigi.
2023 a drenta su segundo mitar cu un mensahe sumamente cla pa hende. Tin un problema serio cu plannan cu hende a traha y cu hende mes a destrui.
Nacionnan Uni ta sigui reuni pero cada bez cu nan bini hunto cu fondonan enorme cu mundo mester produci, nan ta recorda mundo cu e motibo di nan existencia ta mas leu cu nunca.
E bienestar di hende den futuro ta algo cu cada dia ta bira mas cuestionabel.
Kico ta bienestar di mundo y con esaki ta wordo logra?
Na 2024 Weganan Olimpico ta wordo tene na Paris, pero ya ta conoci na mundo cu e organisadornan no a manda invitacion oficial ni pa Rusia ni pa Belaruse debi na e horor cu ser humano ta confronta den e Guera di Ukraine.
Durante e prome parti di 2023, hende a logra lubida cierto berdadnan. Uno di nan ta e posibilidad pa mundo conoce un Tercer Guera Mundial. Nada a cambia pa deshaci di e posibilidad aki, mientras mundo tin problema tambe pa deshaci di petroleo cu ta e productor di mas balor financiero di hende pero tambe e productor di cambio di un clima, cu ta kita hasta cuminda for di boca di hende.
Mundo ta papia hopi. Diariamente nos ta wordo confronta cu mas y mas palabra. Pero kico realmente lo socede concretamente den un mundo cu a bira un contradiccion enorme?
Hende ta conkista tecnologia. Aparatonan sumamente costoso ta yuda alarga bida di hende cu aparentemente no bal nada den e realidad mundial, caminda na 2024 cantidad di pais importante lo dicidi riba nan futuro dirigentenan.
Hulanda, e pais sumamente importante pa Aruba y conoci como uno di e paisnan mas liberal cu mundo a yega di produci pero tambe uno di e paisnan mas rico di Planeta Tera y hasta vencedor di laman cu el a domina, ta den un incertidumbre grandi na porta di eleccion.
Decisionnan electoral na Hulanda lo afecta Aruba pero tambe lo resona den seno di Union Europeo cu pa prome bez for di momento cu Inglatera a despedi di Europa, lo bay urna electoral na 2024.
Na Merca, futuro politico ta un punto di basta discusion. Primarianan den e Partido Republicano ta cuminsa riba termino cortico den situacionnan turbulento. Kico lo socede?
Hende lo mester dicidi pero hende no por dicidi pa clima. Hende no por dicidi pa naturalesa destructor, cu a bira causante di e preocupacionnan mas grandi di hende pero tambe lo exigi cambionan enorme.
Aruba tin e suerte cu un bon gobernacion a tene e pais cu cabez ariba awa. Aruba por traha riba un futuro financiero, social y economico nobo pa su hendenan.
Sinembargo, preocupacion ta keda cu region di Caribe a bira un ruta nobo pa tormentanan cu ta bini for di Oceano.
Mundo ta prepara pa reuni den e Weganan Olimpico cu a wordo introduci atrobe den temponan moderno pa recorda tur hende cu nos ta ruman. Kico a pasa cu fraternidad? El a bira un palabra cu solamente pa haya voto a bira favorito den politica mundial?
2023 e aña lubida practicamente, ta adverti cu hende mester atende cu su mes y cu su planeta.
2023 a drenta su segundo etapa cu un mundo cu claramente tin un problema cu su mes.
Weganan Olimpico lo entrega hopi mensahe na 2024. Uno di nan ya ta un hecho. E cantidad di placa cu un hende mester pa por bay Francia y keda na e pais durante e weganan ta considerabel.
Prijsnan lo sigui subi mientras hende mester evita avion, evita auto, evita tur loke hende a acostumbra.
Con mundo lo ta realmente na 2024? Nos lo a cera 2023 sin menasa pa Guera Mundial?
Pregunta y mas pregunta cu nos kier lubida pero cu contestanan cu ta depende di tur ciudadano y tur hende cu ta biba na planeta Tera.
