Aruba ta drenta 2022 na man di morto di democracia y discriminacion --- *Acusado den Parlamento por exigi tur informacion di Ministerio --- *Acusado di crimen organisa mester dicidi pa Pueblo di Aruba
ORANJESTAD (AAN) — Na 2021e Orden di Ley cu ta regla e gobernacion di Aruba, a habri caminda pa destruccion di democracia.
Aruba no por papia di democracia na e momentonan aki pasobra Parlamento di e pais a bira centro di husticia di clase y asina a mata e concepto di democracia.
Ora resumi e historia di Aruba na 2021, na prome luga mester atende cu e persona of personanan cu mester a dicidi riba resultadonan nacional na 2021.
Esaki a haci cu e prome edicion di e columna aki a analisa e trabou di e Gobierno ehecutivo den cual nos sistema di democracia constitucional ta duna e Prome Ministro (Presidente di e Conseho di Ministro) e lugar central.
Den e edicion di dialuna a atende cu e forma historico cu gobernacion a cay den man di husticia pa medio di casonan di corupcion cu sector independiente di Husticia mester a atende.
Manera nos a bisa nos ta sigui cu e tema awe, ya cu Husticia ta e baluarte di democracia.
Ora papia di democracia, gobernacion di Pueblo y pa Pueblo, husticia mester wordo haci cu Pueblo, loke no tabata e caso na 2021.
E palabra “Husticia” den contexto di democracia ta encera, cu ley ta conta pa tur hende, na mes forma, sin distincion.
Ley sigur ta basa riba moralidad, cu ta dicidi kico un Pueblo ta considera cu ta bon y kico ta wordo considera como malo.
E sistema di gobernacion di Aruba ta basa riba loke ta wordo yama Orden di Ley, loke ta nifica cu no ta por ehempel un dictador ta dicidi kico ta pasa, pero Ley ta dicidi con maneho di un pais ta tuma lugar na tur nivel.
Ley mester proteha asina e ciudadano y a base di Ley mester cera porta pa tur loke ta contra interes y bienestar di e ciudadano y asina di e pais, cu ta totalidad di ciudadania.
Conseho di Ministro ta traha a base di Ley, cu ta bira realidad den Parlamento y ta wordo sostene (enforsa) dor di Husticia.
E Miembro di Parlamento, na nomber di Pueblo ta traha y proteha Ley cu estado democratico no conoce husticia di clase.
E palabranan “husticia di clase” ta encera cu tur ciudadano tin mes derecho, loke for di 2021 no ta e berdad mas na Aruba.
For di momento cu Benny Sevinger a bandona prison den detencion preventivo en espera di e momento cu Huez ta atende su caso penal den Corte y a huramenta como Miembro di Parlamento, husticia di clase a triunfa na Aruba.
Diariamente por lesa con sigur personanan den servicio di Gobierno (di Pueblo) mester bay cas for di momento cu tin sospecho di acto criminal contra nan persona.
Den sector priva ta mantene e regla aki tambe (aunke e empresario ta dicidi finalmente).
Un acusado, un sospechoso di Husticia no ta sigui biba manera nada a pasa, loke si a socede den e caso di Benny Sevinger, cu te awe ta representa Pueblo di Aruba cu derechonan cu ta causa pregunta serio.
Un Miembro di Parlamento tin e derecho di pidi un Departamento di Gobierno pa entrega su persona tur informacion cu e kier.
Benny Sevinger tin e derecho pa pidi tur informacion riba asuntonan di tereno cu e kier.
Benny Sevinger mester controla trabou di Ministronan. Ministerionan y tur departamento di Gobierno, incluso departamentonan cu ta parti di investigacion contra su persona.
Ora papia di e situacion unico den Parlamento, no ta papia di exigencia di “santidad” pero di kiebra di e leynan cu ta impone e exigencia di mas halto na e colegio, cu ta controlador di gobernacion, di democracia y asina di nivel di moralidad y husticia di un Pueblo.
Sosten pa e Estado di Derecho, pues e Orden di Ley, ta parti di Acuerdo cu Hulanda pa asina por combati tur loke ta crimen y ta destrui democracia y e Orden di Ley finalmente.
E acusacionnan di Ministerio Publico contra Benny Sevinger ta sumamente serio y no ta basa solamente riba corupcion pero tambe participacion na crimen organisa entre otro.
2021 asina ta cera Aruba pues cu un Acuerdo cu Reino pa combati kiebra di Orden di Ley na Aruba. Uno di e personanan cu lo mester dicidi den e proceso ta Benny Sevinger, cu na momento cu investigacion a termina, mester presenta dilanti Huez como acusado den caso criminal.
