Otmar Oduber a remarca:
ORANJESTAD (AAN) –Otmar Oduber a trece dilanti, den conferencia di prensa Diaranzon, cu na Aruba tin entre 23 mil cu 25 mil pensionado . Casi 28% di nos comunidad ta hendenan cu ta biba di un pensioen. El a subraya cu e situacion di e pensionadonan no ta bon y cu por keda cera wowo pa esaki, pero e ta creando un problema enorme pa nos comunidad.
Di esaki mas of menos 60%, kiermen un 14 mil pensionado no ta haya mas di 900 florin di entrada, pa luna. E ta puntra con un persona por biba cu 900 florin pa luna. “Den ki condicion bo kier pa nos grandinan cu ta riba 65, 70, 75 aña biba? Ken ta papiando riba esaki? Cual politico a lanta para? Nos a crea un Ministerio pa hendenan grandi ‘ouderzorg’. Dos aña caba, kico ta wordo discuti? Unico cos cu ta discuti ta ‘ban bringa cu un organizacion cu tin, cu ta cuida nos grandinan’, cu ta SABA den e caso aki”, Otmar Oduber a señala.
Oduber a señala cu Aruba tin un problema enorme di na unda nos hendenan ta bay keda ora nan bira grandi. Tin un lista di spera di centenares di hende cu no por cuida nan mes y cu no tin famia den e comunidad aki.
“Nos pensionadonan ta wordo castiga riba tur nivel. Nan ta paga practicamente 100% di nan contribucion di prima. Per average un pensionado ta paga cinco pa diez biaha mas hopi na premie cu un miembro di Parlamento ta paga, na AZV. E ta algo cu ta fundamentalmente robes y ningun hende ta papiando riba dje”, Otmar Oduber a subraya.
El a agrega cu na momento cu un pensionado kier traha pastechi, pan dushi, huur un apartamento chikito pa nan por haya un entrada extra, nan ta wordo bati cu belasting, no riba e pastechi, e pan dushi of e apartamento cu nan ta huur, sino riba full e suma cu nan ta haya como pensionado, mustrando cu tin un discriminacion enorme, den nos comunidad.
“No ta por nada cu mi ta para un rato keto y nos realiza cu e medidanan ultimo di AZV ta traha 100% contra e salud di nos pensionadonan. Netamente esnan cu mas mester di remedi, pasobra nunca nos como pais a percura pa tin un programa di salud pa cuida hende y ainda nos no tin’e drechi, nos pensionadonan ta wordo kita nan remedinan, caminda cu for di nan 900 florin tin cu paga nan”, Oduber a bisa.
Oduber a señala cu e no kier hunga di martir pa e pensionadonan, pero 60 mil alma aki na Aruba ta cobra 900 florin pa luna, anto for di dje tin cu paga nan remedi pa nan por biba y esaki ta punto cu mester bin den dialogo nacional na Aruba, envez di wak ken a haci debe den nos pais. Oduber a expresa cu nos tur a haci debe na Aruba; tur politico den tur portico, un mas cu otro. “Ban para hunto! Un yamada na comunidad y gremionan. Tur hende tin un responsabilidad no politiconan so. Gremionan, prensa, sindicatonan, tur tin un obligacion, dentro di un estado di derecho den un pais democratico cu nos tin, pa lanta para, critica y mustra gobierno cu nos ta para aki pa guia”, Otmar a señala.
