E final politico di e lider tras di decisionnan tuma pa Aruba
*September lo revela realidad pobresa creciente na Hulanda
*Robin Hood lo inspira Mark Rutte na final di su careda?
ORANJESTAD(AAN)—Final di vacacion 2023 ta importante pasobra e ta hiba tur pais den Reino di regreso na 2010.
Varios aspecto importante cu lo afecta Reino, ta bini dilanti na 2010, cu ta topa un mundo na su salida for di e Recesion 2007-2008, cu a wordo causa pa e “crisis di hipoteca” y a bira motibo tambe medida financiero na Aruba.
Den un situacion mundial serio, na October 2010, Antia Hulandes a stop di existi y sigur na e islanan Bonaire, Saba y Sint Maarten un sistema colonial cu e nomber BES a mira luz di dia.
Na Aruba na 2010, mundo casi a wordo invita pa asisti na acto di entiero di Florin Arubano, cu a keda sin rosea pa Mike Eman por a bira Prome Ministro pero Reino Hulandes a pordona Mike Eman, cu a diseña e plan pa companianan Hulandes establece na Aruba, cu lo a bira Hub pues nan punto di contacto comercial.
Hulanda tabata tin un Prome Ministro nobo den Mark Rutte na November 2010. Sinembargo, su cara y nomber a keda menos conoci cu e serie di Ministronan y Secretarionan di Estado di Hulanda, cu a ehecuta maneho di gobiernonan cu su nomber.
Piet Hein Donner y Liesbeth Spies ta e prome dos di e cinco Ministronan cu den un Gobierno Mark Rutte tabata encarga cu Asuntonan di Reino.
Pero tabata Ronald Plasterk, Raymond Knops y Alexandra van Huffelen, cu a bira e tres Miembronan di Gobiernonan di Rutte, cu a pone Aruba realisa e realidad di garantianan di Statuut y posibilidad pa intervencion di Reino.
Ta Statuut tambe ta haci, cu Mark Rutte ta dicidi pa Aruba tambe, pasobra Mark Rutte ta Presidente di e Conseho di Ministro di Reino, cu ta hunto cu Rey Willem Alexander, Gobierno di Reino. Un Parlamento Reino nunca a conoce.
Segun Statuut tambe tin un Ministro Hulandes encarga cu relacionnan den Reino.
Pa comprende e cantidad di Ministronan Hulandes encarga cu ehecucion di relacionnan de Reino for di 2010, mester comprende cu Reino a conoce cuatro Gabinete Rutte, cu a marca record como gobernante di Reino y di Hulanda den historia.
Tabata parce cu Mark Rutte lo a bay hasta contra e principio di realidad cu tur cos conoce nan fin, ora na 2023 el a cuminsa tambalea.
Na e momentonan aki, e problema mas serio ta solucion pa problemanan social scondi na Hulanda.
Problemanan cu sigur lo bini dilanti riba Prinsjesdag, dia 19 di September 2023.
Como Hefe di Estado, Rey Willem Alexander lo presenta e plannan pa gobernacion 2024 cu lo inclui Aruba tambe.
Manera DIARIO a anticipa, problemanan a cuminsa saca cabez na Hulanda. Despues di su vacacion y su prome dia di trabou ayera, Prome Ministro Hulandes, Mark Rutte a indica, cu central den e maneho cu Gobierno ta bay hiba despues di vacacion ta, pa pone un fin na e pobresa alarmente y creciente na Hulanda.
Con esaki lo mester socede a bira un batata cayente den mundo politico Hulandes cu ta prepara su mes pa eleccion.
Den e situacion actual algo serio ta bini dilanti. No ta Aruba so mester prepara su mes enfrenta e posicion di Hulanda pa e pais paga e debe di Pandemia.
Cantidad di companianan Hulandes cu a haya asistencia di estado pa por a enfrenta e pandemia, awor ta den problema serio pa pone e pago di e asistencia cu nan a ricibi riba mesa na un momento cu ta bira conoci cu Europa y Hulanda tambe a sufri na man di inflacion y a conoce un recesion leve.
Un plan cu base comunista ta wordo prepara dor di Gobierno Hulandes, manera informacionnan ta indica. Un plan cu lo mester “nivela rico y pober” segun Rutte.
Un plan cu ya a cuminsa haya resistencia den e totalidad politico di Hulanda, ya cu aparentemente Rutte kier hunga Robin Hood.
Un situacion peligroso y contra democracia manera nan mes ta admiti.
Con ta cubri e hamber creciente cu ta afecta alrededor di Un Miyon persona na Hulanda? Alrededor di Un Miyon persona, loke ta nifica cu uno riba cada 17 persona, lo ta biba den un situacion di pobresa.
Gobernantenan Hulandes a bolbe di vacacion pa prepara pa eleccion. Pero prome cu eleccion nan lo mester enfrenta Pueblo di Hulanda cu berdad di futuro riba Prinsjesdag, ora prome cu e ultimo Gobierno Rutte bay cas, e lo presenta e plan pa gobernacion financiero 2024, cu e ta laga atras hunto cu e titulo di Presidente di Gobierno di Reino!
