ORANJESTAD (AAN): E di dos coaching clinic den colaboracion cu USA Baseball lo tuma lugar dianan 14 y 15 di oktober proximo.
Lo tin tres (3) coach di e USA Baseball coaching staff presente pa duna e training y comparti nan experiencia, y conocimento riba e deporte di baseball.
E programa lo cuminsa oficialmente ariba diasabra, 14 di october unda lo tin e Coaching Session 1 (theoretico) di 12 - 5pm na Universidad di Aruba y ariba diadomingo, 15 di october, lo tin e Coaching Session 2 (practico) di 9am - 3pm na veld.
E motibo principal di organisa e evento aki atrobe ta pa amplia e conocimiento di coachnan na Aruba, cu kier sigui prepara nan mes mihor y a cambio prepara e hungadornan.
Den 2022, e clinica a conta cu e maximo cantidad di participante, basa ariba e feedback di e coachnan a percura pa haci algun cambio na e contenido di e programa tur na beneficio di baseball na Aruba. Ademas, ora di inscribi participantenan por duna input di e area cu nan kier focus ariba dje, pa asina por personalisa e clinic mas aun. Sigur un oportunidad unico pa tur presente.
Baseball na Aruba ta un mundo di voluntario cu tin amor y dedicacion pa e deporte, si nos por sigui combina e pasion y boluntad cu e sed pa conocimiento y mehoracion sigur nos lo mira un desaroyo positivo pa e deporte di baseball na Aruba.
E participantenan por prepara pa dos (2) dia intenso cu coachnan Drew Briese, Steve Butler y Andrew Bartman. Cada un cu nan area di expertisio pa asina contribui na haci e clinic aki uno exitoso.
Un danki na Sport Subsidie pa a kere den y aporta financieramente na e clinic aki cu ayudo di voluntarionan den baseball na Aruba.
