Will Erasmus, Hefe Deporte IBiSA:
*Distancia e biaha aki ta 10.1 Kilometer
ORANJESTAD (AAN) E Hefe di Deporte na Instituto Biba Saludable y Activo (IBiSA), Will Erasmus, a yama un conferencia di prensa den cual el a bisa cu IBiSA ta bay ta promocionando e “Turibana Race 2025” y esaki ta bay ta e di 45 edicion di e carera, cu nan ta yam’e “special edition”.
Esaki pasobra e biaha aki nan ta bay bek den tempo di carera cu tabata sali di Noord bay te Santa Cruz, y ta bay bek na e ruta bieu pa e di 45 edicion. Intencion ta pa wak con e ta bay e biaha aki, y si e ta na agrado cu cada cinco aña, den e lustro, nan ta bay bek cu e carera aki.
“E careda, e aña aki lo start na Caya Frans Figaroa, dilanti Panaderia del Campo, anto ta caba na Santa Cruz, na Centro Deportivo Betico Croes.
“E carera lo tuma lugar dia 7 di September 2025, y e ta sali for do 6’ or di mainta. Hopi importante pa remarca cu e carera di Turibana, ta 10.5 kilometer pero door cu nos ta bay bek na e ruta bieu, e ta bay ta 10.1 km, pa tur hende tin cuenta cu esaki.
“E training ta bay keda igual cu e Turibana cu nos ta haci semper, pa bay bek na e ruta actual otro aña”, Will Erasmus a declara.
Erasmus a remarca cu tin un limite di mil participante pa e carera aki, cual ta promedio un cupo di 400 pa individual, 200 lugar pa 200 team di duo, y un 200 lugar pa hoben.
El a informa tur esnan cu kier participa, cu e registracion ta habri caba, y por haci esaki via e facebook page di IBiSA, unda ta haya e link pa registra den Turibana race 2025.
“Corda cu e Turibana Race ta forma parti di e ‘Rhode Island Series’, cu ta e di tres carera di e series y ainda falta un cu ta bay tuma lugar na November. Kiermen, coriendo tur e careranan aki, bo ta bay forma bo medaya den forma di Aruba, pero tambe den diferente categoria, bo ta participando pa premio. Kiermen, si tur cos ta bon e simannan aki ta bay cuminza duna informacion riba e ‘Leader Board’ di e categorianan aki. Ken nan ta, na ki lugar, kico ta e miho temponan cu ta wordo cori na e momento aki, y tambe nos ta bay ta e premionan cu nos tin, pa e ‘Rodhe Island’ cu nos tin disponible pa e ganadornan”, Will Erasmus a duna di conoce. Finalmente el a reitera su invitacion pa pueblo di Aruba participa na Turibana Race pero tambe na e ultimo Rhode Island Series, cu tambe tin lugar habri, y tambe por inscribi caba.
