Competencia ta weekend otro siman
ORANJESTAD (AAN): Varadero Aruba Marina ta organizando nan tradicional competencia ‘Billfish Tournament’ cu e nomber “Release Masters”, y e biaha aki nan ta dedica e competencia aki na algun piscado cu a perde riba lama e aña aki. “E aña aki nos ta bay pesca pa nan”, e lema di e torneo aki ta indica. Nan ta dedica esaki na Byron, Jarred, Marcelo, Aishell y Davey.
E torneo di pesca aki lo ta di Diabierna 17 di October te Diadomingo 19 di October venidero, y doñonan di boto cu kier participa, tin di registra riba e website di varaderoaruba.com pa nan ta aden.
Segun e organizadornan, comunidad di Aruba ta bira mas fuerte ora cu tur hende uni. Y pesey nan ta spera cu por yuda nan haci e Release Masters 2025 uno special.
Nan ta dedica esaki tambe na e cuatro piscadonan cu a perde cu e yate Energy na luna di Juli 2025.
Tabata Diasabra 12 di Juli 2025 cu yate Energy a sali for di Surfside Marina cu intencion di regresa atardi. Sinembargo algo a bay malo riba Diasabra ora cu nan a bay pisca riba lama na basta miya nautico West-Noordwest for di Arashi Beach.
Nomber di esnan abordo: Abordo di e yate Energy, tin Jarred Croes, Aischell Tromp, Marcelo Heyden, y Davey Croes. Cada uno cu hopi experiencia, y nan ta alavez tata di famia hopi stima pa monton di amigo cu nan tin.
E plan ta semper nan ta regresa atardi despues di pisca, pero prome cu solo baha. Si acaso e pesca ta bayendo bon e dia ey, nan lo keda djis un tiki extra riba lama pa finaliza nan dia cu suerte. Pesey ora cu nan no a regresa na e ora stipula, no a haya esaki nada inusual.
Pero ora cu tabata birando mas laat, famia no a haya ningun yamada ni notificacion cu nan a yega bek tera. Pues basta laat riba Diasabra a dicidi na bati alarma na autoridad local.
Tabatin un buskeda exhaustivo riba lama, cu monton di yate local yudando, Wardacosta di Caribe Hulandes, y Gobierno a hasta pidi cooperacion di paisnan bisiña pa yuda localiza e cuatro yiu di tera stima aki.
E Billfish Tournament aki ta wordo organiza como 3 luna desde nan desaparicion, y ta dedica pa pueblo no lubida riba e cuatro piscadonan aki.
