ORANJESTAD (AAN): E organizacion di SV Britannia ta un organizacion serio cu na October awor ta cumpli 65 aña di existencia.
E team aki a promove pa division Honor na aña 2001 y for di e tempo ey nunca mas a baha di e Division di Honor.
SV Britannia y manera nan ta worde yama E Pumanan di Piedra Plat, ta un di e organizacionnan cu tin tur e divisionan di AVB cuminsando na e categoria di U-5 te cu Hoofdklas, division Veterano di 35+, U-17 Damas y Open class Damas. E meta di SV Britannia semper tabata pa crea lidernan pa nos comunidad y esey nos ta bin ta haciendo.
Tin biaha den bida ta pasa sucedidonan cu no ta positivo pero pa SV Britannia e logronan positivo ta mucho hopi pa menciona. Ora sucedidonan negativo tuma lugar, SV Britannia sa di tuma medida pa trata di evita pa nan no sosode atrobe.
Den e caso specifico aki, den e ultimo wega entre Dakota y SV Britannia di playoff 2022/23, head coach di SV Britannia y 3 hungador a comporta nan mes anti-deportivo y a viola reglanan di e organizacion y articulonan di strafbepalingen di AVB.
Despues cu comision di castigo a scucha e coach, hungadornan concerni y referee, SV Britannia a ricibi for di e comision di castigo/AVB e decision di e cuater personanan unda cu tur cuater a ricibi castigo.
Directiva di SV Britannia ta pidi disculpa na tur e miembronan, fanaticonan, sponsernan, AVB, referee, comision di referee y na mundo di futbol en general pa locual a sosode e dia concerni. Directiva di ta condena e comportacion di head coach y e hungadornan. E head coach di SV Britannia a tuma su retiro y a schors e hungadornan miembro pa e tipo di mal comportacionnan aki.
SV Britannia lo sigui traha ariba bienestar di tur nos miembronan pa un mihor hende den nos comunidad. Tambe nan por bisa cu SV Britannia tabata tin un aña exitoso unda cu nan a titula campeon Copa Betico, Campeon Caya 6 y pa diferencia di un gol nos no a hunga final. Tambe por informa cu SV Britannia ta preparando bon pa Campeonato 2023/24 cu mundo di futbol keda pendiente di e organizacion.
