Speedworld cu boso amigo Hubert the Furai Tiel,
kier a anuncia cu den e sala di reunion di veld di Tanki Leendert, Jason Geerman di The Destroyer racing (kende ta encarga pa organiza e evento di Fayabo Haya), a sinta un reunion cu coredornan di e Categoria cu hopi fanatico di Drag ta sperando pa bini bek.
Durante e reunion cu e coredornan di Extreme Import, Jason a duna un amplio splicacion, di su programa faya bo haya 10 y ta spera di por conta cu participacion di e autonan di Extreme Import, como e main event pa e actividad aki.
Di parti di e coredornan di Extreme Import a señala cu un di nan preocupacionnan ta e traction ariba pista di Palo Marga, ya cu e autonan aki ta autonan cu por core velocidad halto y si e pista no ta cumpli cu e bon traction, chens ta grandi cu e ta hasi di cada pass uno hopi peligroso.
Pa cu esaki Jason a sigura e coredornan di Extreme Import, cu faya bo haya 10, ta bay conta cu asistencia di 3 personanan cualifica pa percura pa e pista por tin e miho traction posible, pesey el a papia ya caba cu Frenk Lacle, Ling Angela y Cady Koolman, kende ta esnan cu lo encarga cu esaki.
Faya bo Haya ya tin ariba su lista 10 auto di Extreme Import, cu lo ta esnan cu lo bay duna e publico fanatico di hopi adrenalina y velocidad un tremendo show. Probablemente lo por tin mas auto di Extreme Import cu lo keda cla y asina hasi e field mas grandi ainda. Dus keda pendiente, cu Speedworld lo sigui informa mas di esaki mientras e dianan ta pasa.
