Ta bay propone pa Aruba bira cede di e mundial na 2024
ORANJESTAD (AAN): Diadomingo ultimo seleccion di Aruba Domino Bond a sali rumbo Punta Cana, Republica Dominicana, pa participa y competi den un Mundial di Domino.
Sra Soraida Boekhoudt cu ta Presidente di e directiva, na cabez di e delegacion aki. Minister di Deporte Endy Croes na nan salida na aeropuerto Internacional Reina Beatrix a desea Aruba Domino Bond tur clase di exito den e mundial di Domino.
Tambe den e congreso cu ta bay tuma luga ayanan, sra Soraida Boekhoudt, Presidente di Aruba Domino Bond lo bay propone pa Aruba lo por bira cede di un mundial na luna di september pa aña 2024. Aruba Domino Bond trahando cu vision y hopi anticipacion, coordinando cu federacionnan y di e forma aki logrando cosnan grandi den deporte pa pais Aruba.
Minister Endy Croes finalisando a desea henter ekipo di Aruba hopi exito den e mundial di Domino na Republica Dominicana.
