Copa Noord 2025 organisa pa Royal Power Tat Fat y HEINEKEN a continua:
ORANJESTAD (AAN): Copa Noord 2025 dedica na Johannes “Poy” Flanegin, Alvaro Barrios, Nel Frank y Francis Arcaya a continua cu varios wega fin di siman na veld di Kudawecha. Diadomingo atardi e ekipo di Salbabo kende ta invicto den pool B a midi forsa contra doñonan di tereno Kudawecha Indians. Salbabo a manda e mensahe bon kla pa tur teamnan di Copa Noord cu Salbabo ta peligroso y alabes por ta e sorpresa di Copa Noord 2025. Salbabo ta derota Kudawecha Indians 6-2.
Kudawecha Indians ta piki 2 careda den cabes di prome inning. Salbabo ta reaciona den bom di 3 inning anotando 3 careda pa bay ariba 3-2 y ta amplia e score cu un careda den bom di 5 inning hasiendo e wega 4-2. Den bom di 6 inning Salbabo ta anota 2 careda mas pa gana e partido finalmente 6-2. Salbabo ta logra seya e victoria pa mantene su invicto liderando pool B y ta celebra den grandi riba tono di Delicious na final di e wega. Salbabo 6 careda, 13 hit, 3 error lagando 9 coredor na base. Kudawecha Indians 2 careda, 4 hit, 3 error y tambe ta laga 9 coredor den circulacion. Elwin Falconi ta bay 6 inning y pues ta cubri henter e ruta pa Salbabo y ta resulta pitcher ganador. Melchor Abreu tambe ta bay completo pero mester conforma su mes cu e derota.
Mihor bateadornan pa Salbabo a resulta Ryan Richardson 4-3, Nigel Calmes, Daniel Fernandes y Angelo Dos Santos Camara tur a bay di 3-2. Pa Kudawecha Indians a destaca na bate Joward Croes di 3-2, Angelo Webb 3-1 y y Jendrick Roga di 1-1. Salbabo ta pasa pa number 1 den pool B cu 2 victoria y 0 derota mientras Kudawecha Indians ta 0-2 na ultimo lugar almomento. Diasabra awor 31 di Mei cuminsando di 5pm Copa Noord ta continua cu 3 wega amistoso 5pm-7pm y 9pm.
Diadomingo 1 di Juni ta 100% pa Mary Joan Foundation
Diadomingo 1 di Juni SV Royal Power ta duna bek pa un bon causa. Lo organisa 5 wega amistoso mientras Mary Joan Foundation lo tin e Bar y Cushina 100% pa nan recauda fondo. Lo hunga henter dia cu un bala di softball color “roos” pa e awareness di cancer y e wega final atardi lo ta entre Spash vs Blackout Girls. Desde 6 pm e banda Phenomenon lo tey pa pone ambiente. Henter pueblo di Aruba ta keda cordialmente invita pa pasa mira wega na veld di Kudawecha y duna bo contribucion na Mary Joan Foundation cual sigur ta pa un bon causa.
