*Lo lanta un comision cu 3 representante di Referee pa bin cu un protocol pa deporte di futbol
ORANJESTAD (AAN): Refereenan di futbol di Arubaanse Voetbal Bond (AVB) a yama un rueda di prensa caminda nan a trece dilanti diferente aspecto, principalmente relaciona cu e incidente di algun siman pasa caminda un referee a wordo maltrata.
Esaki ta e declaracion: "Nos ta aki awe pa tur hende compronde kico Refereenan di Aruba a/ta pasando aden! Pa añanan largo nos a trece na AVB y Clubnan e ponencia cu Refereenan ta wordo abusa verbalmente, fisicamente, na nan autonan personal cu ta wordo kibra y hasta na nan cas etc etc.
10 aña pasa caba nos Refereenan a para campeonato pa e mes un motibo aki cu e situacion di seguridad pa nos Refereenan. E situacion ta degenerando dia pa dia y cu esaki por tin consecuencianan extremo pa nos refereenan.
E casonan a sigui bira mas y mas pio y ni AVB ni Clubnan a preocupa pa tuma esaki na serio.
Den e ultimo añanan por a mira un escalacion di bringamento, atakenan cu cuchio y videonan unda clubnan y dirigentenan cu comportacion anti deportivo y unda hasta muchanan chikito cu ta bin wak weganan di futbol, ta haya ta bon pa coba mama di Refereenan cu tin!
Pero semper den TUR instancia ta e referee tabata fout! Nos a keda soporta soporta y soporta te cu 2 siman pasa e buchi a yena ora un colega di nos Sr. Luis Bedoya cooperando cu un team di AVB a wordo maltrata di tal forma cu awe a perde su wowo!
Y kico clubnan y AVB nan prioridad ta? Sigui cu wega! Niun hende ta compronde cu Refereenan ta humano! Cu Refereenan tin famia y sernan keri y cu tur locual nan a pasa aden asina mes semper a coopera pa weganan sigui aunque mas y mas bao menaza mental y fisico!!!
Y awor cu campeonato ta para atrobe ta e falta di e refereenan!
Luis ta drumi y lanta cu dolor tur dia den su wowo. Si e haya un tiki chance di drumi cu e inmenso dolor di cabez cu e tur dia!
Awe nos ta aki pa duna nos punto y pakico tur referee mester di e garantia di e clubnan prome cu subi 1 tereno pa fluit!
Ora 1 hungador faya gol bashi: pasa bala malo of faya 1 penalty niun reclamo riba social media pero laga 1 Referee hasi 1 fout chikito, mayan, dirigentenan di clubnan mes ta skeiro video rond!
Wel awe nos ta akinan pa kita tur duda unda nos ta para y kico nos kier pa ta regla prome bala cuminsa lora!
Nos ta aki paso berdad Refereenan a para futbol mirando cu e esencia di e wega cu ta e seguridad di tur hende y di e Refereenan tambe.
Ta di lamenta cu algo asina serio mester a pasa pa e Refereenan por a haya e atencion pa nan seguridad atendi.
E puntonan di nos:
- E cuerpo di Referee cu Aruba tin, ta hendenan cu un pasion incredible pa futbol. Pero nos mester cuida nos mes y nos mester tabatin tempo pa verwerk e caso cu a pasa y pa wak con ta sigui pa dilanti NO pa nos Refereenan so, pero pa tur cu ta gusta y aprecia e weganan di futbol.
- Despues di e sucedido cu colega Bedoya, nos a reuni inmediato den nos seno y despues a reuni cu un delegacion di AVB unda a wordo palabra cu nos Refereenan lo manda un carta pa AVB cu e puntonan di seguridad cu mester cambia prome cu 1 referee subi tereno, locual a pasa y nos a manda e carta aki cu 10 punto pa AVB,
- Nos a enfatisa atrobe cu nos kier fluit, pero cu un mehoracion tanto di dirigentenan di clubnan y fanaticada pa cu e respet y seguridad di nos futbol.
- Siman pasa diamars a sinta cu bestuur di AVB na unda nos a repasa riba 10 punto cu a bay pa AVB y nos a sera varios acuerdo riba nan.
Nos ta wardando riba e carta di AVB y CLUBNAN unda clubnan lo garantisa e seguridad di nos refreenan riba nan tereno.
- AVB a segura cu dañonan na autonan di Refereenan lo wordo cubri pa AVB
6 Si tin menaza, insulto, agresion of cualkier situacion incomodo cu un referee y of cualkier otro insiguridadnan, e referee lo para e wega y inmediatamente traha un rapport
Y asina ta deliberando mas puntonan tambe pa e clubnan y stadion tin suficiente seguridad cu tur hende sinti nan mes safe.
E punto mas cardinal cu ta den deliberacion ta, cu lo lanta un comision cu 3 representante di Referee, 3 di AVB y 3 di e clubnan pa asina bin cu un protocol pa e deporte di futbol bira mas agradabel pa tanto Refereenan, hungadonan y fanaticada en general por disfruta sanamente di nos deporte Rey cu ta FUTBOL!
Pa aclarea, lo reanuda cu partidonan 20 di October 2023 cu div Honor y Div. 1 y HoR ta warda riba contesta por escrito di e clubnan cu nan lo bay cumpli pa cu e seguridad di Refereenan riba nan tereno, pa por reanuda cu U17 y U20 tambe.
Cu esaki nos kier duna un palabra di pronto recuperacion na colega Luis Bedoya y suplica fanticonan, dirigentenan y hungadornan: FAIR PLAY Y RESPECT!
