ORANJESTAD (AAN): E emocion ta aumentando segun nos ta acercando pa Weganan Interinsular 2024 y e ekipo di schaken di Aruba no ta keda atras!
Cu dedicacion y pasion nos atletanan ta drentando e fase final di nan preparacion, asegurando cu nan ta cla pa enfrenta e desafio cu ta spera nan.
E sesionnan di entrenamento intensivo ta programa pa tuma lugar durante ultimo simannan prome cu e competencia marcando un momento crucial den e caminda pa exito. E atletanan lo beneficia di entrenamento specialisa na e siguiente fechanan y orario: diamars, 20 y 27 di Februari, 5:30 pm - 6:30 pm, Diasabra, 24 di Februari, 1:30 pm - 3:00 pm.
E lugar pa e encuentronan aki lo ta na e Centro di Bario Dakota na unda e federacion di schakken tin un espacio adecuado pa cada atleta.
Nos orguyo ta crece segun nos mira e dedicacion y esfuerso di cada miembro di e equipo. Bou e guia experto di e entrenadornan Carol Williams y Jose Pesqueira, nos atletanan di schaken ta desaroyando nan habilidadnan y estrategia di wega na un nivel impresionante. E combinacion di experiencia, pasion, y dedicacion ta formando un ekipo cu ta prepara pa sobresali.
IBiSA ta hopi satisfecho cu e forma con conan ta bayendo y ta desea e ekipo di schaken lo miho durante nan preparacion. Nos ta convenci cu nan dedicacion y esfuerso lo traduci den prestacionnan extraordinario durante Weganan Interinsular 2024 contra Bonaire y Curaçao.
E comunidad di Aruba ta keda invita pa apoya nos atletanan for di dia 29 di februari te cu dia 3 di maart y na C. B. Dakota. Sigui nos na caminda p’e exito y celebra e espirito deportivo cu ta bibrando den cada entrenamento na caminda p’e competencia.
Ta desea nos ekipo di schaken lo miho y ta conta cu nan pa eleva e nomber di Aruba den e Weganan Interinsular!
Ban Aruba! Nos ta mas cu prepara pa enfrenta e desafio y demostra nos talento na e Weganan Interinsular 2024!
