ORANJESTAD (AAN): Papaya Racing Team ta un ekipo cu desde 2016 ta competi na caredanan di auto chikito, mihor conoci como Hot Wheels.
Despues di exitoso inauguracion di pista y caredanan di Hot Wheels na mei 2023 na Papaya Ranch, e peticion a bira uno grandi pa organiza un careda di Hot Wheels categoria Pick-up Stock y Stock Open 60 gram riba un pista un poco mas largo.
Tur cos ta cla pa caredanan di Hot Wheels e fin di siman aki na Papaya Ranch y cu un pista aun mas largo.
Ayera nan a inscribi, y awe Diasabra 25 di Mei 2024 pa 5:00 pm, caredanan di categoria Pick-up Stock lo start.
Diadomingo 26 mei 2024 pa 10:00 am lo tin caredanan di categoria Stock Open 60 gram.
Pa cada categoria Papaya Racing lo tin trofeo, premio cash y hopi doorprizes danki na tur patrocinadornan.
Papaya Racing ta invita un y tur pa asisti y apoya tur coredornan di Hot Wheels na Papaya Ranch y manera costumber lo tin bar y cushina bon surti.
