Trahando pa e bienestar di deporte na nivel Regional
ORANJESTAD (AAN): Comite Olimpico Arubano a duna di conoce cu Secretaria General di COA, Nicole Hoevertsz a keda nombra den dos comision importante di Panam Sports, cu ta e organisacion regional cu ta maneha deporte Olimpico den e region Panamericano.
E prome di e dos comisionnan cu Nicole lo forma parti di dje y lo fungi como presidente ta e comision “Comision de Deporte Seguro”, cu ta sigur un tema hopi importante como e parti di “SAFE SPORT”. E tema di deporte sigur ta esencial pa salvaguardia e bienestar di tur hende den e mundo di deporte.
COA ta reconoce e importancia di esaki, y recien a manda Betzabeth Rasmijn pa e pais di Panama p'asina participa den e capacitacion cu a ofrece pa cu “Safe Sport”, cu pronto lo inicia diferente proyecto den e ambito aki. Banda di esaki, Nicole lo ta den e comision di “Comision de Etica y Buen Gobierno” cu ta enfoca den e parti di bon gobernansa y etica, cu tambe ta puntonan clave den e plan strategico di Comite Olimpico Arubano.
Ta desea Nicole hopi exito cu e retonan aki, y ta sigur cu lo por conta cu su experticio y experencia pa asina aplica locual e lo aplica na nivel regional na Aruba.
