ORANJESTAD (AAN): Recientemente a tuma lugar un reunion den un esfera ameno, unda Minister di Deporte Endy Croes a ricibi bishita di William “Bill” Edington di Kansas City, Merca.
Tambe presente durante e reunion tabata Brian Horn, coach di ekipo di Merca den e disciplina di bowling alavez ex-hungado profesional bowling y señora Izaira Mansur.
Bill Edington ta representa USA Athletes International, y e ta alavez amigo pa hopi aña di e titular local di Deporte. Den pasado, Edington ta trece diferente deporte e.o. basketball, softball, futbol, bowling etc y hungadonan na diferente parti di mundo e.o Aruba.
E biaha aki, Bill Edington a informa Minister Endy Croes cu nan tin planea pa organiza un competencia grandi di bowling na Aruba den luna di Juni 2023, y lo haci esey hunto cu e coach di ekipo di Merca, esta Brian Horn
Nan a mira e facilidad di Eagle Bowling den preparacion pa e torneo unda cu ta trece un ekipo grandi di Merca pa competi na Aruba. Durante e reunion a intercambia idea. Sr. Edington a reuni tambe cu Aruba Bowling Association (ARBAS) cu ta e federacion di bowling di Aruba.
Actualmente sr. Edington y su ekipo ta den e proceso pa finalisa e plan prome cu fin di aña cual lo worde publica. Minister Endy Croes ta desea nan hopi exito cu e preparacion y organizacion pa e campeonato di bowling.
