Evento special di Winter League...
ORANJESTAD (AAN): Minister Endy Croes tabata presente na e Conferencia di Prensa di Proline Baseball Aruba, unda cu Sr. Kevin James a anuncia oficialmente participacion di Sr. Chadwick Tromp den e torneo di Proline Winter League 2023
Esaki ta pa prome biaha den historia cu Atlanta Braves y e “agent” di Sr. Chadwick Tromp a bay di acuerdo pa Chadwick por hunga e torneo di Winter League 2023 na cas dilanti su pueblo. Despues di 11 aña, Chadwick ta hunga back na su pais. E catcher di Atlanta Braves Chadwick Tromp lo forma parti di ekipo di Eagles den e Proline Winter League 2023. Sr. Chadwick Tromp ta debuta Diabierna dia 10 di november.
Minister Endy Croes a enfatisa cu Chadwick sigur lo inspira e hobennan y motiva e otro prospectonan pa den futuro participa den e torneo. E simia cu Proline Baseball Aruba ta planta awe, sigur lo cosecha fruta den e aña nos dilanti y e torneo di Winter League lo sigui crece.
E aña aki tin alrededor di 300 hungado den tres diferente categoria. E torneo di Winter League 2023 ta dedica na e rumannan Thiel esta, Sr. Johny, Sr. Feliz, Sr. Mariano, Sr. Wilfrido, Sr. Arie y Sr. Emiliano Thiel, kendenan den nan carera di baseball semper nan a resalta den diferente posicion cu nan a hunga.
Pa conclui, Minister Endy Croes ta gradici Sr. Kevin James y e ekipo di Proline Baseball Aruba, Lotto pa Deporte, Setar NV y Eagle Aruba Resort pa haci esaki posibel. Alavez, ta desea e hungadonan hopi exito den e torneo di Proline Winter League 2023 cu a inicia dia 5 di november y ta finalisa dia 20 di december proximo. Cu e deseo, disciplina, dedicacion y determacion ta logra.
