Otro atleta elite di Stingray Swimming Team:
ORANJESTAD (AAN): Mientras cu hopi atleta ta soñando di competi na e nivel di mas halto, Mikel Schreuders, otro orguyo di Stingray Swimming Team, ta sigui demostra cu disciplina, perseverancia y excelencia ta produci resultado extraordinario. Durante e prestigioso TYR Pro Swim Series 2026 na Indianapolis, un di e competencianan mas fuerte na Merca, Mikel a entrega un actuacion sobresaliente den e evento di 100 Metro Pecho (Breaststroke).
Despues di registra un tempo di 1:02.29 den e preliminarnan, Mikel a subi su nivel den e final y a touch cu un impresionante 1:01.70, bahando casi seis diesimo di seconde di su tempo inicial.
-Un record nacional nobo pa Aruba
Kibra un Record Nacional no ta solamente un logro personal. Ta un refleho di añanan di compromiso, entrenamento y e buskeda constante pa excelencia. Mikel ta sigui inspira no solamente e siguiente generacion di landadornan Arubano, pero tambe tur atleta cu ta soña den grandi. Den un campo competitivo yena di atleta internacional y nivel mundial, Mikel a confirma atrobe cu Aruba tin talento pa competi entre e mihornan.
-E DNA di Stingray
Na Stingray Swimming Team, nos ta kere cu excelencia no ta un evento; ta un cultura.
E logro di Mikel ta representa e balornan cu Stingray ta fomenta tur dia, mescos cu ta den e caso di Elisabeth Timmer: Disciplina – Perseverancia – Profesionalismo y Pasion pa excelencia.
Di mucha cu un soño pa e compromiso pa ta un atleta olimpico, Stingray ta sigui ta comprometi na desaroya e deportistanan cu por representa Aruba cu orguyo riba escenario internacional.
-Orguyo di Stingray y Aruba
Mikel Schreuders ta continua na skirbi su nomber den historia di deporte Arubano y demostrando cu cu trabou duro, consistencia y determinacion, no tin limite pa loke un atleta Arubano por logra. Bo logro ta un victoria pa Aruba, un inspiracion pa nos landadornan hoben y un otro capitulo di excelencia den historia di Stingray Swimming Team. Henter famia di Stingray Swimming Team ta sumamente orguyoso cu e logro aki y sigur tin mas pa bin.
