ORANJESTAD (AAN): Bon noticia sigur! IQ foiler Malik Hoveling, ARU-31 a logra un solido segundo lugar den e evento completo
cu bataya contra Mateus Isaac (posiciona number 3 di mundo) y e Argentino ex-RSXer Francisco Saubidet (Medalista Olympico hoben y participante di weganan Olympico Tokyo 2022).
Cu situacion di biento menos favorable na Armação de Búzios, Brasil, e tabata un combinacion di navega strategicamente y tuma e riesgo na e momento correcto.
E ultimo dia di careda tabata tin bataya real cu resultado hopi cerca como cu Malik a bringa incansabel pa keda posiciona na segundo lugar, pero na final e Segundo lugar cu diferencia di punctuacion minimo a bay pa Argentina y Tercer lugar pa Aruba.
DIARIO a compronde, cu pa e weganan otro luna na Odesur, ambos atleta (Malik y Francisco) lo representa nan pais.
Den e mesun weekend Ethan Westera y Tom de Vries a atende e World Sailing Test event na Den Haag como un evento di training na caminda pa e Olympic Qualifier otro aña. Condicionnan di biento tabata no favorabel cual a resulta den solamente 2 dia di careda despues di full un siman di training intensivo cu biento perfecto y resultado hopi favorabel!
IQ foil team Aruba na e momento aki ta direccion Paris cu chens hopi grandi pa qualifica directo pa weganan Olympico.
E Segundo parti di e aña lo ta super druk cu competencianan importante pa qualificacion pa weganan Olympico y eventonan importante na Latino America.
Otro luna, nan lo ta Odesur Games na Paraguay como tambe nan lo asisti e World Championships cu lo tuma lugar na Brest, Francia.
Pa saca mayor probecho pa e isla di Aruba, e Atletanan lo ta presente na ambos banda di oceano. Pa luna di November IQ foil team Aruba lo tin nan simannan di training na Aruba mescos cu ta tuma lugar e ultimo 2 añanan hunto cu e Dutch IQ foil team (hunto cu medayista Olympico Kiran Badloe) y como tambe e team di Noruega.
E IQ winter training ta haya mas atencion den e mundo di IQ y mas e interes ta pa otro participantenan di rond mundo bishita nos isla cu e condicionnan di tremendo di biento cu nos isla tin y cual ta un promocion perfecto pa Aruba.
